Հենրիխ Հիմլերը սերտ կապեր է պահպանել իր մոր` Աննայի հետ, և պարբերաբար նրան բացիկներ է ուղարկել Եվրոպայի տարբեր քաղաքներից: Բացիկները, որոնք ուղարկվել են Ֆրանսիայից, Նորվեգիայից և Իտալիայից, աճուրդի կհանվեն Մեծ Բրիտանիայում: Այս մասին գրում է Guardian-ը:
«Հիմլերը կաթոլիկ է եղել, և մայրը նրա վրա մեծ ազդեցություն է ունեցել: Նա կապի մեջ է եղել իր մոր հետ պատերազմի տարիներին։ Հաղորդագրությունները շատ կարճ են, սակայն բացահայտ երևում է, որ Հիմլերը շատ էր մտածում մոր մասին»,- ասել է Mullock աճուրդային տան ներկայացուցիչ Ռիչարդ Վեստվուդ Բրուքսը:
Ամենահիշարժան բացիկներից մեկի վրա պատկերված է Փարիզում գտնվող Ալեքսանդր 3-րդի կամուրջը: Բացիկը գրված է գերմանացիների կողմից Ֆրանսիայի մայրաքաղաքը գրավելուց մի քանի օր հետո:
«Իմ սիրելի մայրիկ, ջերմորեն քեզ բարևում եմ Փարիզից: Հուսով եմ՝ քեզ մոտ ամենինչ լավ է»,- գրված է բացիկի մեջ:
Հռոմից ուղարկված բացիկի վրա պատկերված է Բենիտո Մուսոլինին: Աճուրդի կհանվի նաև 1941 թ. Նորվեգիայից ուղարկված բացիկը, որտեղ Հիմլերը նշում է, որ ինքն ուղևորվում է Տրոնդհեյմ, որտեղ տեղի են ունենում հակասեմական ցույցեր:
Ամբողջ արխիվը կարող է 40 հազար ֆունտ արժենալ:
