Ադրբեջանական ANS PRESS-ի փոխանցմամբ՝ Ադրբեջանի խորհրդարանը երկրորդ ընթերցմամբ ընդունել է «Ադրբեջանի Հանրապետության նախկին նախագահների ու նրանց ընտանիքների անդամների ապահովման վերաբերյալ» օրինագիծը։ Այդ օրինագիծը բաղկացած է 12 կետից։
Ադրբեջանի Սահմանադրության համաձայն՝ «նախկին նախագահ» են համարվում այն անձինք, ովքեր զբաղեցրել են Ադրբեջանի նախագահի պաշտոնը, նախագահի պաշտոնը զբաղեցրած և կյանքից հեռացածները, ինչպես նաև այն անձինք, որոնց լիազորությունները չեղյալ են հայտարարվել Սահմանադրության 104-րդ հոդվածի համաձայն։
Օրինագծի համաձայն՝ նախկին նախագահների թոշակը հավասարեցվելու է այդ պաշտոնում նրանց ամսական աշխատավարձի 50 տոկոսին։ Նախկին նախագահի մահվան դեպքում այդ վճարումները ստանալու է նրա կինը, իսկ վերջինիս մահվան դեպքում՝ երեխան (մինչև չափահաս դառնալը)։ Սահմանադրության 107-րդ հոդվածի համաձայն՝ իմփիչմենթի միջոցով գահընկեց արված նախագահները զրկվում են այդ թոշակից։
Օրինագիծը ենթադրում է պետության նախկին ղեկավարներին ու նրանց ընտանիքների անդամներին բժշկական, նյութական ու սոցիալական ապահովում։ Նախկին նախագահը ստանում է 3 մարդուց բաղկացած թիկնազոր, մեկ վարորդ, մեկ ծառայողական ավտոմեքենա, ցմահ դիվանագիտական անձնագիր (նաև կնոջ համար)։
Դրանով նախկին նախագահներին (ու նրանց կանանց) շնորհվում է անձեռնմխելիության կարգավիճակ։ Նրանց դեմ չեն կարող վարչական ու քրեական գործեր հարուցել մինչ նախագահ դառնալը կամ նախագահական լիազորությունները կատարելիս իրականացրած գործողությունների համար։
Անձեռնմխելիության կարգավիճակը տարածվում է Ադրբեջանի նախկին 3 նախագահների (Այազ Մութալիբով, Աբուլֆազ Էլչիբեյ, Հեյդար Ալիև) վրա, սակայն նրանցից երկուսը մահացած են, և միայն Մութալիբովն է ողջ ու բնակվում է Մոսկվայում։
