ՀՀ կառավարության մամլո ծառայությունից «Առաջին լրատվական»-ը տեղեկանում է, որ վարչապետ Տիգրան Սարգսյանն ընդունել է ԱՄՆ հյուսիսարևմտյան համալսարանի Ջոն Քելոգի մենեջմենթի բարձրագույն դպրոցի միջազգային մարքեթինգի պրոֆեսոր, մարքեթինգի պրոֆեսոր Ֆիլիպ Կոտլերին:
Վարչապետն իր խոսքում հույս է հայտնել, որ վերջինիս այցը Հայաստան կխթանի մեր երկրում մարքեթինգի զարգացումը:
Տ. Սարգսյանի խոսքով` մեր կարևորագույն խնդիրներից մեկն այսօր կառավարման համակարգի արդիականացումն է և այդ համատեքստում նրա դասախոսությունները կարող են մեծապես նպաստել մեր աշխատանքների լավագույնս իրականացմանը:
Ֆ. Կոտլերն ասել է, որ Հայաստանում առկա են մաքեթինգի զարգացման լավ նախադրյալներ և անհրաժեշտ է ճիշտ ու հետևողական քաղաքականություն վարել:
Զրուցակիցներն անդրադարձել են նաև զբոսաշրջության, կրթության և տեղեկատվական տեխնոլոգիների ոլորտներում մարքեթինգային ռազմավարության իրականացմանը վերաբերող խնդիրներին, քննարկել նաև Հայաստանում մարքեթինգային գերազանցության կենտրոնի ստեղծմանն ուղղված հարցեր:
Վարչապետը ողջունել է այդ գաղափարը և պատրաստակամություն հայտնել օժանդակել կենտրոնի ստեղծման գործում:
Ֆ. Կոտլերը Հայաստան կատարած մեկշաբաթյա այցի ընթացքում սեմինարներ է անցկացնում գործարարների և ուսանողների համար:
