Թուրքական Milliyet թերթի փոխանցմամբ՝ ԱՄՆ Կոնգրեսը հավանության է արժանացրել Թուրքիային 111 միլիոն դոլարի սպառազինություն վաճառելու վերաբերյալ գործարքը։ Խոսքը մասնավորապես Թուրքիային AH-1W Super Cobra տիպի երեք մարտական ուղղաթիռներ վաճառելու մասին է։
Նշվում է, որ ամերիկյան ղեկավարությունը Թուրքիային սպառազինություն վաճառելու խնդրանքով հոկտեմբերի 28-ին դիմել էր Կոնգրեսին, որն էլ այսօր տվեց իր համաձայնությունը։ Ուղղաթիռները Թուրքիային կհատկացվեն հենց այժմ, իսկ մնացյալ ռազմական տեխնիկան՝ առաջիկա մի քանի ամիսներին։
Հիշեցնենք, որ մոտ 10 օր առաջ մի խումբ կոնգրեսականներ Կոնգրեսի դիտարկմանն էին ներկայացրել թիվ 83 բանաձևը, որով Վաշինգտոնին կոչ էին անում զենք չվաճառել Թուրքիային։ Կոնգրեսականները նշել էին, որ իրենց մտահոգում է Թուրքիայի բացասական դիրքորոշումը ԱՄՆ-ի դաշնակիցների՝ Իսրայելի, Հայաստանի և Կիպրոսի նկատմամբ.
«Թուրքիան սպառնում է Իսրայելին, շարունակում է օկուպացրած պահել Հյուսիսային Կիպրոսը, Հայաստանին ուժեղ շրջափակման է ենթարկել։ Անկարան այսպես է վերաբերում մեր բարեկամների ու դաշնակիցների հետ, միևնույն ժամանակ մեր ամենահայտնի թշնամիների հետ սերտ կապեր է հաստատել։ Թուրքիային զենք վաճառելիս Վաշինգտոնը պետք է հաշվի առնի այս մտահոգությունները»։