«Նոր ժամանակներ» կուսակցության նախագահ Արամ Կարապետյանը համոզված է, որ Արևմուտքին չի հաջովի ԼՂ հակամարտության կարգավորման գործընթացից վերջնականապես դուրս մղել Ռուսաստանին, որքան էլ նրա այդ ցանկությունը մեծ լինի: Նման տեսակետ Կարապետյանը հայտնեց «Առաջին լրատվական»-ի հետ զրույցում:
«Արևմուտքը փորձում է Ռուսաստանին դուրս մղել ոչ միայն ԼՂ հակամարտության կարգավորման գործընթացից, այլև Անդրկովկասից առհասարակ, և դա արդեն 2 տարի: Ընդհանուր առմամբ, Արևմուտքը Ռուսաստանին Անդրկովկասից դուրս հանելու հստակ գործընթաց է սկսել: Այդ համատեքստում է նաև հաջորդ տարի Վրաստանի` ՆԱՏՕ-ի անդամության դիտարկման հնարավորությունը:
Եթե Արևմուտքի գործողությունները հաջողությամբ ընթանան, ապա գործընթացը կհասնի նաև Կովկասին: Սակայն Արևմուտքը միանշանակորեն չի հաջողի իր այս պլաններում, դա անհնար է: Ռուսաստանի դուրսմղումը տարածաշրջանից վտանգավոր է, քանի որ դրանից անմիջապես հետո բազմաթիվ խնդիրներ կառաջանան, այդ թվում` ոչ միայն ԼՂ հակամարտության առնչությամբ, այլ նաև կապված տարածաշրջանի հետ: Դա կնշանակի Հայաստանից միանգամից դուրս բերել ռուսական ռազմաբազան, ռուս սահմանապահներին, հարց կբարձրանա ազգային անվտանգությունը արտաքին ուժերից պաշտպանելու առնչությամբ»,- նկատեց Արամ Կարապետյանը:
«Նոր ժամանակներ» կուսակցության նախագահի խոսքով, «միշտ ամեն ինչ սկսվում է շոշափելուց, և Արևմուտքը կամաց-կամաց մոտենում են հարցի բուն էությանը»: «Հարցը շատ խրթին է, և թե ինչպիսի՞ հակահարված կլինի Ռուսաստանի կողմից, կամ ի՞նչ փաստարկներ կներկայացնի նա, հայտնի չէ: Ինչպես երևում է, Ռուսաստանը առայժմ փաստարկներ չի բերում, բայց ես մի բան գիտեմ. եթե Ռուսաստանն ինչ-որ ընթացք լուռ է, պետք է սպասել, որ ինչ-որ պահի շատ ակտիվ բան է անելու»,- ամփոփեց Կարապետյանը:
