ՀՀ պաշտպանության նախարարության տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ նոյեմբերի 11-ին Սյունիքի մարզի Դավիթ-Բեկ բնակավայրի մոտ տեղի է ունեցել հայ սակրավորների կողմից ականազերծված տարածքների հանձնումը մարզային իշխանություններին:
Ականազերծված տարածքների հանձնումն իրականացվել է «Հումանիտար ականազերծման և փորձագիտական կենտրոն» ՊՈԱԿ-ի կողմից:
Արարողությանը մասնակցել են Հայաստանում Գերմանիայի Դաշնային Հանրապետության արտակարգ և լիազոր դեսպան Հանս Յոխեն Շմիդտը, ԱՄՆ-ի ռազմական կցորդի տեղակալ Ջասթին Բադդը և այլ պաշտոնատար անձինք:
ՊՈԱԿ-ի տնօրեն Ռուբեն Առաքելյանը նշել է, որ գարնանը մեկնարկած աշխատանքների արդյունքում ականազերծվել է շուրջ 21 հեկտար հողատարածք:
Հայտնաբերվել և վնասազերծվել են բազմաթիվ նռնակներ, տարբեր տրամաչափի փամփուշտներ, հակատանկային և հակահետևակային ականներ:
Համապատասխան համակարգերի միջոցով մեկ անգամ ևս ճշգրտվել և ստուգազննվել է ականազերծված տարածքը, որից հետո ականազերծումը փաստող և տարածքի սահմանագոտին ճշգրտող հավաստագիրը հանձնվել է Սյունիքի մարզպետ Սուրեն Խաչատրյանին:
Վերջինս կարևորել է միջազգային դոնոր կազմակերպությունների լրացուցիչ ներդրումները, որոնք կնպասեն ականազերծման գործընթացի ակտիվացումը:
Հրադադարի հաստատումից հետո դեռ ականապատված են ՀՀ շուրջ 60 բնակավայրերի հարակից տարածքներ: Կասկածելի տարածքները 102-ն են` շուրջ 322 կիլոմետր քառակուսի մակերեսով:
Հրադադարի հաստատումից մինչ օրս ականներից և չվնասազերծված զինամթերքից Հայաստանում տուժել է ավելի քան 400 մարդ` 112-ը մահացու ելքով:
Ամենամյա ականազերծման նմանօրինակ աշխատանքների արդյունքում գյուղատնտեսական կիրառման համար պիտանելի են դառնում նորանոր հողատարածքներ, իսկ ամենագլխավորը` նվազում է չվնասազերծված զինամթերքի պայթյունի հետևանքով հնարավոր դժբախտ պատահարների հավանականությունը:
