Թուրքիայում ներքաղաքական վիճակն այնպիսին է, որ հայ-թուրքական հարաբերությունների կարգավորումը այդ երկրի համար ներկայում ամենակարևոր հարցը չէ. թուրքերը չեն ցանկանում հարաբերությունների կարգավորման առաջընթացի հետ կապված քայլեր անել:
Այսօր տեղի ունեցած մամուլի ասուլիսում այս մասին հայտարարեց Կովկասի ինստիտուտի տնօրեն Ալեքսանդր Իսկանդարյանը` հավելելով, որ ինքը նման տպավորություններով վերջերս է վերադարձել Թուրքիայից, ուր մասնակցում էր մի կոնֆերանսի:
«Ես նույնիսկ հայ-թուրքական գործընթացի շուրջ փոքրիկ դեմարշ արեցի` ասացի, որ սահմանը պետք է բացվի առանց նախապայմանների: Սակայն ցավալի է, որ մեռյալ կետից հարցի առաջխաղացման ոչ մի նշան Թուրքիայի կողմից չկա: Ես պայմաններ չեմ տեսնում, որ թուրքերն այս ուղղությամբ ինչ-որ նոր քայլ ձեռնարկեն»,- ասաց քաղաքագետը:
Խոսելով Թուրքիայի` «զրո խնդիր` հարևանների հետ» կարգախոսի մասին` նա նկատեց, որ Թուրքիան այս կերպ ցանկանում է մեծացնել տարածաշրջանում իր դերակատարությունը:
Անդրադառնալով ղարաբաղյան հակամարտության հարցին` Իսկանդարյանն ընդգծեց, որ մոտ ժամանակներս ոչ մի փոփոխություն այդ ուղղությամբ հնարավոր չէ, և հակամարտության լուծման մասին լրջորեն խոսել չարժե:
«Հայաստանում, Ֆրանսիայում, Ռուսաստանում և ԱՄՆ-ում ընտրություններ են սպասվում: Մեծ խաղացողների համար, մեղմ ասած, առավել կարևոր հարցեր կան` եվրոպական ճգնաժամը և Արաբական երկրներում առկա իրավիճակը: Այնպես որ` ղարաբաղյան հակամարտության առաջխաղացում չի լինի»,- նկատեց նա:
Իսկանդարյանը նաև տեսակետ հայտնեց, ըստ որի` Ադրբեջանի` ՄԱԿ-ի ԱԽ ժամանակավոր անդամ ընտրվելը կարևոր է Ադրբեջանի իսկ քարոզչության տեսանկյունից, սակայն հակամարտության լուծմանը նպաստելու առումով մեծ ազդեցություն չի ունենա:
Պատասխանելով «Առաջին լրատվական»-ի հարցին` որքանո՞վ է հավանական համարում ԵԱՀԿ Մինսկի խմբի ֆրանսիացի համանախագահ Բեռնար Ֆասյեին ԵՄ արտաքին քաղաքականության հարցերով պատասխանատու Քեթրին Էշթոնով փոխարինելու հնարավորությունը (Սերժ Սարգսյանի հետ հանդիպման ժամանակ նման զարգացումը չէր բացառել Եվրախորհրդարանի անդամ Քրիստիան Վիգենինը), Ալեքսանդր Իսկանդարյանը նշեց.
«Եվրոպան փորձելու է ավելի մեծ դեր խաղալ ԼՂ հակամարտության լուծման հարցում, սակայն քիչ հավանական եմ համարում, որ ֆրանսիացի համանախագահին փոխարինեն Քեթրին Էշթոնով:
Նախ` կարծում եմ, որ ԵԱՀԿ Մինսկի խումբը արդեն որերորդ տարին է` հրաշալի է կատարում իր դերը: Իսկ նրա դերը բանակցությունների ձևաչափի պահպանումն ու հակամարտող կողմերի հանդիպումների ինտերնացիոնալիզացումն է` այլ կողմերին ևս դրանց մեջ ներգրավելը և ոչ` հակամարտությունը լուծելը:
ԵԱՀԿ Մինսկի խումբը չի կարող կողմերի փոխարեն լուծել հակամարտությունը: Հակամարտությունը լուծել կարող են միայն Հայաստանը, ԼՂՀ-ն և Ադրբեջանը: Կարծում եմ` ծայրահեղ բարդ և անարդյունավետ կլինի հարցի լուծման ձևաչափը փոխելը»:
