Apple ընկերությունը առաջին սերնդի iPod nano ձայնարկիչների մարտկոցներում դեֆեկտ է հայտնաբերել, ինչի պատճառով ընկերությունը հետ է կանչել սարքերը: Ընկերության կայքում նշվում է, որ «առանձին դեպքերում» մարտկոցը կարող է տաքանալ, ինչը սպառնում է օգտատիրոջ անվտանգությանը:
iPod nano ձայնարկիչների տերերին առաջարկվում է մասնակցել «փոխանակման ծրագրին». վերադարձնել սարքը Apple-ին և փոխարենը ստանալ նորը: Ծրագիրը գործում է բոլոր երկրներում:
ԸՆկերությունը նշել է, որ դեֆեկտում մեղավոր է մարտկոցների մատակարար ընկերությունը: Առավել վտանգավոր են համարվում 2005 թ. սեպտեմբերից մինչև 2006 թ. հոկտեմբեր վաճառված առաջին սերնդի iPod nano ձայնարկիչները: Ձայնարկիչների տերերը ընկերության կայքում սերիական համարով կարող են ստուգել` արդյոք իրենց սարքը ենթակա՞ է փոփոխման, թե՞ ոչ:
Նշենք, որ 2009 թ. նույնպես Apple-ը հետ էր կանչել առաջին սերնդի iPod nano ձայնարկիչները, սակայն այդ ժամանակ ծրագիրը գործում էր միայն Հարավային Կորեայում:
Առաջին սերնդի iPod nano ձայնարկիչները թողարկվել են 2005 թ.:
