Թուրքական իշխանությունները կազմակերպում են Սիրիայում Թուրքիայի դեսպանատան աշխատակիցների տարհանումը:
Այս մասին հայտնում է France-Presse գործակալությունը և ավելացնում, որ Սիրիայից դուրս կբերվեն նաև դեսպանատան աշխատակիցների ընտանիքները: Այնուամենայնիվ, դեսպան Օմար Օնխոն և այլ ղեկավար աշխատակիցներ կշարունակեն մնալ Դամասկոսում:
Դամասկոսում ցուցարարները փորձել են շշերի ու քարերի միջոցով հարձակվել Թուրքիայի դեսպանատան վրա: Ցուցարարներին կանխելու համար ոստիկանները ստիպված են եղել օգտագործել արցունքաբեր գազ:
Լատակիա քաղաքում 5 հազար ցուցարարներ հարձակվել են թուրքական հյուպատոսության վրա և այրել թուրքական դրոշը:
Հիշեցնենք, որ հարձակման են ենթարկվել նաև Սաուդյան Արաբիայի, Ֆրանսիայի, Կատարի դեսպանատները:
Նախկինում Թուրքիան ու Սիրիան համագործակցող երկրներ էին, սակայն մի քանի ամսվա ընթացքում իրավիճակը փոխվեց:
