ԱՄՆ Թեքսաս նահանգի համալսարանի Անդերսոնի անվան ուռուցքաբանական կենտրոնին (The University of Texas MD Anderson Cancer Center) հաջողվել է մշակել նոր դեղամիջոց, որն ի վիճակի է հալեցնել ճարպային կուտակումները: Կապիկների վրա կատարված փորձարկումները ցույց են տվել, որ ադիպոդիտի (Adipotide) ամենօրյա ներարկումները թույլ են տալիս ճարպի 40 տոկոսը հալեցնել ընդամենը մեկ ամսվա ընթացքում:
Ինչպես գրում է The Daily Mail-ը, Science Translational Medicine ամսագրում հրապարակված հոդվածում նշվում է, որ մարմնեղ կապիկներին ամեն օր ներարկումներ են կատարել, ինչի արդյունքում կապիկները կորցրել են իրենց քաշի 11 տոկոսը: Մարդկանց համար գիրացման դեմ այս դեղամիջոցը կհամարվի արդյունավետ այն դեպքում, եթե վեց ամսվա ընթացքում նրանք կորցնեն իրենց քաշի 5 տոկոսը:
Մասնագետները լավատեսորեն են տրամադրված և գտնում են, որ նոր դեղամիջոցը նույնքան արդյունավետորեն «կհալեցնի ճարպերը»: Նրանք նշում են, որ դեղի արդյունքը կարելի է զգալ հենց առաջին օգտագործումից: Ակտիվ բաղադրիչների շնորհիվ նրանք ոչնչացնում են ճարպային բջիջները` միաժամանակ փակելով ախորժակը:
Ի տարբերություն նիհարեցնող այլ դեղամիջոցների, ադիպոտիդը չի ազդում ուղեղի վրա և չի սպառնում առողջությանը: Մասնագետները նշում են, որ փորձարկման ժամանակ նկատել են ընդամենը մեկ թերություն. այն կարող է առաջացնել երիկամների գործունեության խանգարումներ, սակայն վստահ են, որ հետագայում կարող են վերացնել նույնիսկ այդ թերությունը:
Ապագայում գիտնականները մտադիր են առաջարկել նաև շագանակագեղձի քաղցկեղով հիվանդների համար դեղամիջոց:
