12-ամսյա կտրվածքով Կենտրոնական բանկը նախատեսում է առավելապես հարմարվողական դրամավարկային քաղաքականության սցենար, կամ որ նույնն է՝ տնտեսության աճի տեմպերի դանդաղմանը համահունչ դրամավարկային ցուցանիշների աճի տեմպերի դանդաղում:
Այսպես. հաջորդող մեկ տարվա հորիզոնում փողի և դրամային զանգվածների աճերը կանխատեսվել են համապատասխանաբար 18.2% և 20.1%, իսկ փողի բազայի աճը՝ 9.7%: Ակնկալվում է շրջանառությունում գտնվող կանխիկ դրամի 13.0% աճ, ինչը կուղեկցվի դրամային ավանդների 28.5% և արտարժութային ավանդների 15.6% աճով: Նշված շարժերի արդյունքում սպասվում է տնտեսության դոլարայնացման մակարդակի 2.2%-ով նվազում, ինչպես նաև տնտեսության փողայնացման ավելի քան 9.0% աճ:
Դրամավարկային քաղաքականության կանխատեսված բազային սցենարի ներքո նախատեսվում է նաև հաջորդ մեկ տարվա հորիզոնում ֆինանսական համակարգի կողմից տնտեսության վարկավորման աճի տեմպերի դանդաղում: Վարկավորման աճը 2012 թ. սեպտեմբերի վերջին ակնկալվում է 20.3% կամ շուրջ 250.0 մլրդ դրամ` այս տարվա երրորդ եռամսյակի վերջի 36.7%-ի կամ մոտ 330.0 մլրդ դրամի փոխարեն, ինչը հիմնականում կուղղվի փոքր ու միջին բիզնեսի վարկավորմանը և հիփոթեքային վարկավորման աշխուժացումը:
ԿԲ Դրամավարկային քաղաքականության ծրագրի համաձայն՝ պայմանավորված վարկավորման աղբյուրների կառուցվածքում առևտրային բանկերի կողմից արտասահմանից ներգրավված արտարժութային միջոցների մեծ տեսակարար կշռի պահպանմամբ, տնտեսության վարկավորման մեջ դեռևս գերակշռող կլինեն տնտեսությանը տրամադրվող արտարժութային վարկավորման ծավալները:
