Արցախի Հանրապետության նախագահ Բակո Սահակյանը նոյեմբերի 10-ին այցելել է Շվեյցարիայի Բեռն քաղաք և խորհրդարանում հանդիպել այդ երկրի կարևորագույն կուսակցությունները ներկայացնող մի խումբ պատգամավորների հետ:
Հանդիպմանը քննարկվել է Արցախի ներքին կյանքին, երկկողմ հարաբերությունների զարգացմանը, ադրբեջանա-ղարաբաղյան հակամարտության կարգավորմանը և տարածաշրջանային զարգացումներին առնչվող հարցերի լայն շրջանակ:
Բ. Սահակյանն ընդգծել է, որ Արցախը շահագրգռված է Շվեյցարիայի Համադաշնության հետ ամուր կապերի հաստատմամբ և կարևորել է միջխորհրդարանական փոխգործակցությունը:
Նրա խոսքով` ԼՂՀ-ի համար առանձնակի հետաքրքրություն է ներկայացնում Շվեյցարիայի փորձը գյուղատնտեսության և կրթության ոլորտներում:
Բ. Սահակյանը հատուկ ընդգծել է Շվեյցարիայի հետ համագործակցության նշանակությունը ժողովրդավարությա, հատկապես տեղական ինքնակառավարման ինստիտուտի զարգացման գործում:
Երկուստեք կարևորվել է երկկողմ կապերի խորացումը և այս ուղղությամբ փոծգործակցության կոնկրետ ծրագրերի մշակումն ու իրականացումը:
Հանդիպմանը մասնակցում էին ԼՂՀ Նախագահի աշխատակազմի տեղեկատվության գլխավոր վարչության պետ Դավիթ Բաբայանը, Շվեյցարիայում ՀՀ արտակարգ դեսպանորդ եւ լիազոր նախարար Սաթենիկ Աբգարյանը, Հայ-շվեյցարական բարեկամության խորհրդարանական խմբի քարտուղար Սարգիս Շահինյանը, պաշտոնատար այլ անձինք: