Facebook ընկերությունը ԱՄՆ կառավարության հետ համաձայնություն է կնքելու օգտատերերի գաղտնի տվյալները պահպանելու համար:
Ինչպես հայտնում է Wall Street Journal-ը՝ հղում անելով սոցցանցի գլխավոր տնօրեն Մարկ Ցուկենբերգի` երկուշաբթի արած հայտարարությանը, Facebook-ը և ԱՄՆ կառավարությունը կնքելու են համաձայնություն, ըստ որի՝ Facebook-ը օգտատերերից թույլտվություն կհարցնի գաղտնիության պահպանման քաղաքականության մեջ էական փոփոխություններ կատարելու վերաբերյալ: Սա նշանակում է, որ Facebook-ը չի կարող տարածել գաղտնի տվյալներ, եթե դա չի թույլատրվել օգտատատերի կողմից:
Համաձայնության տեքստը մոտակա ժամանակներս կհաստատվի դաշնային առևտրային հանձնաժողովի կողմից, որը վերջին ամիսներին օգտատերերի անձնական տվյալների գաղտնիությունը ամրապնդելու ազդանշաններ էր տալիս:
Համաձայնությունը կարող է մեծ ազդեցություն ունենալ ամբողջ համացանցում, քանի որ ցանցում գործում են միլիոն սերվերներ և ընկերություններ, որոնք մշակում են մարդկանց համացանցում ուղղորդելու համակարգերը: Նմանատիպ ընկերությունները գումար են աշխատում օգտատերերի անձնական տվյալները հավաքելով և վաճառելով:
2009 թվականի դեկտեմբերին Facebook-ի հասցեին գաղտնիության խախտման մեղադրանք էր առաջադրվել: Այդ ժամանակ սոցցանցը առանց օգտատատերի թույլտվության հանրային էր դարձրել օգտատերի մասին տեղեկությունը` անունը, պրոֆիլի նկարը, բնակության վայրը, սեռը, ինչպես նաև ընկերների ցուցակը: «Անազնիվ փոփոխությունների» հետ կապված օգտատերերի մի քանի բողոքներ ուղարկվել են ԱՄՆ դաշնային առևտրային հանձնաժողով:
Տվյալների գաղտնիության խնդիրը լուծելու՝ Facebook-ի որոշումն ի հայտ է եկել ընկերության հնարավոր վաճառքի մասին շրջանառվող խոսակցությունների ֆոնին: Որոշ գնահատականներով՝ Facebook-ի կարող է վաճառվել 100 միլիարդ դոլարով: