Նոյեմբերի 23-ին Հովհաննես Թումանյանի անվան տիկնիկային թատրոնում տեղի կունենա «Դոգմա» խմբի «UNDER ԴՈԳՄԱ» համերգը:
Ինչպես «Առաջին լրատվական»-ի հետ զրույցում ասաց «Դոգմա» խմբի հիմնադիր, բաս կիթառահար Վարդան Գրիգորյանը, համերգը հերթականներից չէ, այլ ունենալու իր ասելիքը, և փորձելու ենք որևէ դոգմատիկ սահմանումների մեջ չմտցնել համերգը:
«Ցանկանում ենք, որ մարդիկ գան համերգ լսելու ու ինչ-որ բան տեսնելու ու հասկանալու: Մենք PR խումբ չենք, մրցանակաբաշխային չենք, չենք մասնակցում նմանատիպ միջոցառումներին: Քանի որ մենք փոփ մտածելակերպի հետ չենք առնչվում, մեզ մոտ համերգների կազմակերպումն աղմկոտ չի ստացվում, պետք էլ չէ: Մեր փոխարեն երաժշտությունը կխոսի»,- տեղեկացրեց Վ. Գրիգորյանը` հավելելով, որ համերգն անցնելու է միջազգային չափանիշներին համապատասխան:
Խումբը մոտ երկու ժամանոց համերգին, նրա խոսքով, կկատարի ոչ միայն հին ու սիրված, այլև նոր կատարումներ, որոնք շատ քչերին են ծանոթ, քանի որ փառատոնային ֆորմատների մեջ դրանք չեն տեղավորվում:
Նրա խոսքով` մեզանում «ռոք» բառն այնքան են տանջել, որ ինչին ասես «ռոք» են ասում, իսկ իրենք ուղղակի «Դոգմա» են` պրոգրեսիվ էթնիկ մետալ խումբ:
«Մերը ռոքնռոլ չէ, բլյուզ չէ, կլասիկ ռոք չէ»,- նշեց նա:
Վ. Գրիգորյանը չբացառեց, որ գուցե հետագայում խումբը վերանվանվի ու կոչվի «UNDER ԴՈԳՄԱ», որովհետև խմբի անվանումն ի սկզբանե որոշված է եղել գրել հարցական նշանով, սակայն դիզայներական լուծմամբ որոշվել է հարցականը չդնել: