BBC-ի ռուսական ծառայության փոխանցմամբ՝ Իրանը պահանջում է հետաքննել ամերիկյան ղեկավարության այն հայտարարությունը, որն առնչվում է ահաբեկչությանը Թեհրանի մասնակից լինելուն։ Այս մասին այսօր տեղի ունեցող Շանհայի համագործակցության կազմակերպության (ՇՀԿ) կառավարությունների ղեկավարների նիստում հայտարարել է Իրանի արտգործնախարար Ալի Աքբար Սալեհին։
Վերջինս անհիմն է որակել ամերիկյան մեղադրանքը. «Ահաբեկչական ակտի պլանավորման հարցում Իրանի հասցեին ոչ վաղ անցյալում հնչած կեղծ մեղադրանքներից հետո Իրանն անհրաժեշտ է համարում հետաքննություն անցկացնել՝ կապված ամերիկյան կառավարության այդօրինակ պնդումների տարածման հետ։ Այդպիսի հայտարարությամբ ԱՄՆ-ը նպատակ է հետապնդում լուծելու իր խնդիրները և պառակտելու մյուս երկրներին։
Իրանը դեմ է ամեն տիպի ահաբեկչական գործունեությանը և դատապարտում է ահաբեկչության բոլոր տիպերը։ Իրանն ահաբեկչական ակտերի արդյունքում կորցրել է 16,000 մարդ»։
Հիշեցնենք, որ ավելի վաղ ԱՄՆ-ն իրանական կողմին մեղադրել էր Վաշինգտոնում Սաուդյան Արաբիայի դեսպանի նկատմամբ մահափորձի նախապատրաստման ու կազմակերպման մեջ։