Հունաստանի վարչապետ Յորգիոս Պապանդրեուն պատրաստ է հրաժարական տալ և իշխանությունը փոխանցել անցումային կառավարությանը: Այս մասին հաղորդում է Reuters գործակալությունը` վկայակոչելով կառավարության իր աղբյուրը:
Վերջինս հայտնել է, որ այս պահին բանակցություններ են ընթանում ժամանակավոր կառավարության ձևավորման շուրջ:
Ավելի վաղ հաղորդվում էր, որ Պապանդրեուն կտրականապես հերքում է իր հրաժարականի հնարավորությունը: Կառավարությանը վստահության քվե տալու քվեարկությունը տեղի կունենա այսօր:
Երեկ Պապանդրեուն հայտարարել էր, որ քաղաքական ճգնաժամը չխորացնելու համար պատրաստ է կազմել կոալիցիոն կառավարություն: Նա ակնարկել էր, որ կհրաժարվի ԵՄ օգնության փաթեթի ընդունման հանրաքվե անցկացնելու գաղափարից, ինչը բացասական արձագանք էր առաջացրել ավանդատուների և ընդդիմության շրջանում:
Հիշեցնենք Պապանդրեուի հրաժարականի անհրաժեշտությունն առաջացավ այն բանից հետո, երբ վերջինս հայտարարեց, թե երկրում անցկացնում է հանրաքվե Եվրամիության և Արժույթի միջազգային հիմնադրամի օգնության փաթեթն ընդունելու շուրջ: Վարչապետի այս համարձակ առաջարկը հնչեց այն բանից հետո, երբ ԵՄ առաջնորդները մեծ դժվարությամբ կարողացել էին համաձայնեցնել Հունաստանի օգնության նոր ծրագիրը, որը գնահատվում էր 130 մլրդ եվրո:
Սոցիոլոգիական հարցումները ցույց են տալիս, որ հույների կեսից ավելին դեմ են հանդես գալիս նոր ծրագրին: