Սիրիական իշխանությունները Սիրիայի քաղաքներից, բնակավայրերից դուրս են բերում բանակային ստորաբաժանումները, ազատ են արձակում բանտարկյալներին, որոնք ձերբակալվել էին ցույցերի արդյունքում: Դամասկոսը այդ քայլին է գնացել Արաբական երկրների լիգայի պատվիրակության հետ բանակցելուց հետո:
Ինչպես հայտնում է Reuters գործակալությունը, Կատարի վարչապետ Շեյխ Համադ բեն Յասիմ Ալ-Թանին հայտարարել է, որ Արաբական երկրների լիգան կշարունակի իր աշխատանքները, որոնք ուղղված կլինեն իշխանությունների և ընդդիմության միջև կառուցողական երկխոսության սկսելուն. դա նախատեսվում է երկու շաբաթվա ընթացքում:
Արաբական երկրների լիգայի պատվիրակությանը հաջողվել է նաև Սիրիայի իշխանություններին համոզել, որ թույլ տան օտարերկրյա ԶԼՄ-ներին լուսաբանել երկրում տիրող իրավիճակը:
Չնայած Արաբական երկրների Լիագայի այս ձեռքբերմանը՝ Վաշինգտոնը մտադիր չէ ճնշումները մեղմացնել Բաշար Ալ-Ասադի նկատմամբ: ԱՄՆ-ի կարծիքով՝ Բաշարը կորցրել է իր օրինական իշխանությունը և իրավունք չունի կառավարել երկիրը:
Հիշեցնենք, որ 2011 թվականի մարտից Սիրիայում սկսված հակակառավարական ցույցերի ընթացքում Սիրիայի իշխանությունները ճնշումներ են գործադրում խաղաղ բնակիչների նկատմամբ: ՄԱԿ-ի տվյալներով՝ Սիրիայում այս ցույցերի ժամանակ մահացել է ավելի քան 3000 մարդ:
