Ինչպես տեղեկացրել է թուրքական Internethaber լրատվական կայքը` Թուրքիայի խորհրդարանում` Ազգային բարձրագույն ժողովում, կստեղծվի հակահայկական լոբբիստական խումբ, որը կպայքարի Հայոց ցեղասպանության ճանաչման համար հայերի կողմից տարվող աշխատանքների դեմ: Այս մասին հայտարարել է Թուրքիայի «Ազգայնական շարժում» կուսակցության անդամ Յուսուֆ Հալաչօղլուն, ով հայտնի է իր հակահայկական դիրքորոշումներով:
Հալաչօղլուն պարզաբանել է, թե սփյուռքը 1915թ. դեպքերի 100-րդ տարելիցին ընդառաջ նախապատրաստական մեծ աշխատանքներ է իրականացնում, ուստի`Թուրքիայի խորհրդարանը պետք է քայլեր ձեռնարկի: «Կուսակցությունների գլխավորությամբ պետք է ինչ-որ բան նախաձեռնել, և մեր նախաձեռնությունը պետք է տեղափոխել միջազգային ասպարեզ»,- նշել է Հալաչօղլուն:
Հալաչօղլուն նաև հայտնել է, որ այդ թեմայի շրջանակներում զրուցել է Թուրքիայի խորհրդարանի նախագահի հետ և նրանից դրական արձագանք է ստացել:
