ՀՀ կրթության և գիտության նախարարության մամլո ծառայությունից «Առաջին լրատվական»-ին տեղեկացնում են, որ այսօր Արմեն Աշոտյանը և «Հայաստանի պատանեկան նվաճումներ» հասարակական կազմակերպության գործադիր տնօրեն Արմինե Հովհաննիսյանը ստորագրել են համագործակցության հուշագիր` ուսուցիչների վերապատրաստման, ուղեցույցների և մեթոդական ձեռնարկների մշակման, դպրոցական և զանգվածային միջոցառումների կազմակերպման վերաբերյալ:
Ողջունելով նախաձեռնությունը` ՀՀ կրթության և գիտության նախարարը հուշագրի շրջանակում կարևորել է հատկապես դպրոցական ծրագրում տնտեսագիտական և ձեռներեցության հմտությունների ներգրավումը: Նախարարը մասնավորապես նշել է. «Աշխարհում, որն այսօր ունի իր կանոնները, հաջողակ է համարվում նորարար և ստեղծագործ մարդը: Մենք` որպես կրթության լիազոր մարմին, կարևորում ենք աշակերտների նախաձեռնողականությունը: Այդ իմաստով դպրոցներում երեխաներին ձեռներեցության մասին տարրական գիտելիքներ տալը ժամանակի պահանջ է: Միայն պետության ջանքերը բավարար չեն լրացուցիչ կրթության այժմյան պահանջարկը բավարարելու համար: Փորձը ցույց է տալիս, որ առավել հաջողված են կրթական այն նախաձեռնությունները, որոնք իրականցվում են հասարակական կառույցների հետ համատեղ»:
Նախարարը նշել է, որ ՀՀ ԿԳՆ-ն և «Հայաստանի պատանեկան նվաճումներ»-ը համատեղ աշխատանքի արդյունավետ փորձ ունեն: Համագործակցության արդյունքում կազմակերպվել է ուսուցիչների վերապատրաստում, հանրակրթական պետական ծրագրերում ներմուծվել են «Կիրառական տնտեսագիտություն», «Մարդու իրավունքներ», «Քաղաքացիական կրթություն», «Պետություն և իրավունք» առարկաները, որոնք միավորվելով 2010 թվականից ներառվել են «Հասարակագիտություն» ինտեգրված առարկայի ծրագրում:
«Հայաստանի պատանեկան նվաճումներ» կազմակերպության գործադիր տնօրեն Ա. Հովհաննիսյանը ՀՀ ԿԳ նախարարության հետ աշխատանքը գնահատել է հաջողված և շնորհակալություն հայտնել համագործակցությունը ամրապնդելու համար: Միջոցառմանը ներկա է եղել նաև ԱՄՆ Միջազգային զարգացման գործակալության (ՄԶԳ) հայաստանյան գրասենյակի ղեկավար Չիմա Ջեթինդերը:
