Ռուսաստանի արտգործնախարար Սերգեյ Լավրովը Մոսկվայում տեղի ունեցած մամուլի ասուլիսում մեկնաբանել է «Գրավեք Ուոլ Սթրիթը» ակցիայի շուրջ վերջին իրադարձությունները:
Ռուսաստանի արտաքին քաղաքականության գերատեսչության ղեկավարի խոսքերով` Արևմուտքի երկրները չեն ցանկանում քննարկել սեփական խնդիրները, իսկ դրանք, ըստ նրա, գնալով ավելանում են:
«Այն, թե ինչպես են վերաբերվում, օրինակ, «Գրավեք Ուոլ Սթրիթը» ակցիայի մասնակիցներին, բավական հստակորեն լույս են սփռում այն բանի վրա, որ արևմտյան երկրների մեր մեծ թվով գործընկերներ երկակի ստադարտներ են քարոզում»,- հայտարարել է Լավրովը:
Նա նշել է, որ բարի կամքի և կառուցողական մոտեցման առկայության դեպքում Ռուսաստանի իշխանությունները պատրաստ են նստել և պատասխանել այս կամ այն հարցերին:
«Գրավեք Ուոլ Սթրիթ» ակցիան տեղի է ունենում արդեն մի քանի շաբաթ: ԱՄՆ-ի, ԵՄ-ի և Ավստրալիայի տարբեր քաղաքներում ցուցարարները պահանջում են իրենց երկրների իշխանություններից փոխել տնտեսական քաղաքականությունը: Երբեմն ցույցերը վերածվում են ոստիկանական ուժերի հետ բախումների:
