Ֆրանսիայի ընդդիմադիր սոցիալիստական կուսակցության մի շարք ներկայացուցիչներ քննադատել են նախագահ Նիկոլա Սարկոզիի դիրքորոշումը, որը Եվրոպայի պարտքային ճգնաժամը լուծելու համար բացահայտ ակնկալում է Չինաստանի օգնությունը:
Ինչպես հայտնում է Bloomberg պարբերականը, սոցիալիստական կուսակցության գլխավոր քարտուղար Մարտին Օբրիի համար դա իսկական շոկ է եղել: Օբրիի խոսքերով՝ Եվրոպայի ֆինանսական խնդիրները պետք է եվրոպական խնդիրներ լինեն: Նա կարծում է, որ պետք է գործի դնել Եվրոպական կենտրոնական բանկը կամ EFSF հիմնադրամը վերափոխել լիակատար բանկի` ուրիշի օգնությանը չապավինելով:
Նմանատիպ կարծիք է հայտնել նաև Ֆրանսիայի նախագահի թեկնածու, սոցիալիստ Ֆրանսուա Օլանդը: Իսկ Debout la Republique կուսակցության թեկնածու Նիկոլա Դյուպոն Էնյանը Չինաստանի օգնությունը անվանել է «կեղտող փողեր»:
Նշենք, որ Եմ գագաթնաժողովից հետո Եվրոպայում սկսեցին ակտիվորեն քննարկել Չինաստանի և Բրազիլիայի դերը եվրոգոտու պարտքային ճգնաժամի կարգավորման հարցում: Սպասվում է, որ Մեծ քսանյակի` նոյեմբերի 3-4-ը կայանալիք գագաթնաժողովում կկոնկրետացվի Եվրոպային տրամադրվող գումարի չափը։ Ավելի վաղ հայտնվել էր, որ Բրազիլիան հրաժարվել էր գնել եվրոպական երկրների պարտքերը:
Մինչդեռ սեպտեմբերի 14-ին Xinhua գործակալությունը հայտնել էր, որ Չինաստանը ակնկալում է, որ, եվրոպական երկրների օգնությամբ, իր տնտեսությանը կտրվի շուկայականի կարգավիճակ:
