ԱՄՆ հանրապետականները սուր քննադատության են ենթարկել երկրի նախագահ Բարաք Օբամայի արտաքին քաղաքականությունը մասնավորապես Իրաքին և Լիբիային վերաբերող հարցերում:
Ինչպես հաղորդում է Reuters գործակալությունը՝ հանրապետականներ Հերման Քեյնը, Մայքլ Բահմանը, Ռիք Փերրին, որոնք նույնպես ցանկանում են առաջադրվել 2012 թ. նախագահական ընտրություններին, հեռուստատեսային քննարկումների ժամանակ մի շարք սուր նկատողություններ են արել Օբամայի արտաքին քաղաքականության վերաբերյալ: Այսպես՝ Քեյնը և Փերրին 2011 թ. վերջին նախատեսվող՝ ամերիկյան զորքերի դուրսբերումը Իրաքից համարում են ռազմավարական սխալ հաշվարկ: «Իր որոշմամբ Օբաման հասել է միայն Իրաքում անիշխանության հաստատմանը»,- կարծում է Քեյնը:
Փորձագետների կարծիքով` Օբաման Իրաքից զորքերի դուրսբերումը կօգտագործի որպես իր նախընտրական քարոզարշավի գլխավոր խաղաքարտերից մեկը, քանի որ այդպիսով զգալիորեն կկրճատվեն ռազմական ծախսերը` հօգուտ գործազրկության դեմ պայքարի նրա ծրագրի:
Բացի այդ, Լիբիայում հեղափոխության հաղթանակը նույնպես կարող է դիտվել որպես ԱՄՆ արտաքին քաղաքականության հաջողություններից: Սակայն Բահմանը կարծում է, որ Լիբիայի գործերին ԱՄՆ միջամտությունը չմտածված քայլ էր: «Մենք հասանք Լիբիայում անկարգությունների հաստատմանը:
Ընդհանրապես հստակ չէ, ով կգա այնտեղ իշխանության: Չէ՞ որ երկրում քաոսը և անկարգությունները հանգեցնում են ծայրահեղականության, և կարող է այնպես պատահել, որ Լիբիայում իշխանության գա հզոր ծայրահեղական խմբավորում»,- ենթադրում է Բահմանը:
Նրա կարծիքով` ԱՄՆ-ը պետք է իր ուշադրությունը կենտրոնացնի Իրանի և նրա միջուկային ծրագրի վրա, որը սպառնում է վերածվել միջուկային զենքի մշակման լայնածավալ նախագծի:
