Կոտրած տաշտակի մասին հայտարարությունը, որ նախորդ շաբաթ արել էր վարչապետ Տիգրան Սարգսյանը, առաջին հայացքից՝ ընդհանրական հասցեով, իսկ խորքում՝ ակնհայտորեն ԲՀԿ-ին ուղղված, ըստ երևույթին, շատ մեծ ներկոալիցիոն փոթորիկ է առաջացրել: Այնքան, որ Հայաստանի վարչապետը արդեն մի քանի օր է, ինչ զբաղված է իր հայտարարության մեջ շտկումներ մտցնելով, ամեն կերպ փորձելով համոզել հանրությանը, որ իր խոսքն ուղղված չէր ԲՀԿ-ին: «Այն պատասխանը, որ ես տվել եմ Ազգային ժողովում, մեջբերված էր Հանրապետության նախագահի խոսքերից` կամուրջներ կառուցելու մասին»,- հայտարարել էր Տիգրան Սարգսյանն իր հերթական բացատրության կամ արդարացման ժամանակ: Այսինքն՝ վարչապետը փորձում է պատասխանատվությունը դնել Սերժ Սարգսյանի վրա՝ նրան հրապարակավ օգնության կանչելով:
Ակնհայտ է, որ երբ ԱԺ-ում, պատասխանելով լրագրողների հարցերին, Տիգրան Սարգսյանը արեց քաղաքական բավական աղմկոտ այդ հայտարարությունները, դրանում արտահայտվեց ներքաղաքական զարգացումներում նրա դերակատարության բարձրացման լուրջ հայտը: Սակայն, ըստ ամենայնի, Տիգրան Սարգսյանը չկարողացավ մինչև վերջ բավարարել «հայտի» չափանիշներին, և այժմ ստիպված է թե՛ արդարանալ, թե՛, մյուս կողմից էլ, օգնության կանչել Սերժ Սարգսյանին կամ գուցե նույնիսկ մատնել Սարգսյանին, քանի որ, հայտարարելով, թե ինքն ընդամենը հանրապետության նախագահի խոսքերն է կրկնել, Տիգրան Սարգսյանն ըստ էության խոստովանում է, թե ով էր իրեն տվել համարձակ հայտարարություններով հանդես գալու և հստակ մեսիջներ հղելու թույլտվությունը կամ քարտ-բլանշը: Չի բացառվում նաև, որ Սերժ Սարգսյանն այդպիսով փորձում է սատարել Տիգրան Սարգսյանին:
Եթե փոքր-ինչ պարզեցված կամ ինչ-որ չափով կոպիտ բնութագրենք իրավիճակը, ապա երևի թե Սերժ Սարգսյանը Տիգրան Սարգսյանին ասել է. «Կհայտարարես այսպես և այսպես, իսկ եթե մեկն ու մեկը քեզ բան ասի, կասես, որ ես եմ ասել»: Հիմա Տիգրան Սարգսյանն ասում է, որ դա Սերժ Սարգսյանն է իրեն ասել՝ եթե շարունակենք իրավիճակի այդ փոքր-ինչ պարզեցված և կոպիտ բնութագրումը: Թե հատկապես ինչի հետ գործ ունենք այդ բավական հակասական իրադրության մեջ՝ միարժեքորեն ասելը դժվար է: Թվում է, որ կա թե՛ նահանջի, սեփական խոսքերից արդարանալու պահ, թե՛ նաև որոշակի ակնարկ հենց այն մասով, որ Տիգրան Սարգսյանի խոսքերի հետևում կանգնած է Սերժ Սարգսյանը, և եթե հարցեր կան, ապա պետք է դիմել Սերժ Սարգսյանին:
Ընդհանուր առմամբ, իրավիճակը բավական բնորոշ է Հայաստանի իշխանության մեջ առկա մթնոլորտին, որտեղ բոլորը դադարել են միմյանց վստահել, ինչի պատճառով էլ խուսափում են հստակ գնահատականներից, որովհետև դրանք նվազեցնում են հեղինակների մանևրելու հնարավորությունը, ինչը շատ կարևոր և նույնիսկ կենսական հնարավորություն է իշխանության մեջ փոխադարձ անվստահության՝ գրեթե գերադրական աստիճանի պայմաններում: