ՀՀ վարչապետ Տիգրան Սարգսյանն այսօր կառավարության նիստի ժամանակ, պարզաբանել է ՀՀ արդարադատության նախարար Գևորգ Դանիելյանի ազատման պատճառները:
«Առկա» գործակալության փոխանցմամբ, վարչապետն ասել է, որ Դանիելյանն ազատվել է իր պաշտոնից` իր ծառայողական պարտականությունները ոչ պատշաճ կատարելու պատճառով:
«Հարկադիր կատարման ղեկավարը լրջորեն խախտել է բարոյական չափանիշները, և արդարադատության նախարարին հանձնարարվել է պատժել նրան: Ցավոք նախարարը չի կատարել այդ հանձնարարությունը: Կարծում եմ` դա անընդունելի է»,- ասել է վարչապետը` կարևորելով էթիկական նորմերի պահպանումը բոլոր բաժիններում:
Վարչապետի խոսքերով, պաշտոնյաների վարքագիծը, հատկապես իրենց աշխատակիցների նկատմամբ, կարևոր է. «Եթե մենք ուզում ենք, որ մեր երկրի զարգացումը լինի այնպիսին, ինչպես արտացոլված է կառավարության ծրագրերում»:
«Յուրաքանչյուրիս վարքագծից շատ բան է կախված…. Անընդունելի եմ համարում նմանատիպ պահելաձևը, որը վտանգում է հասարակության վստահությունը մեր նկատմամբ: Կառավարությունը այս հարցում շատ խստապահանջ է»,- նշել է վարչապետը:
Հիշեցնենք, որ Գևորգ Դանիելյանը կարգապահական տույժ է տվել ԴԱՀԿ պետ Միհրան Պողոսյանին: ՀՀ արդարադատության նախարար Գևորգ Դանիելյանը անվավեր է ճանաչել ՀՀ դատական ակտերի գլխավոր հարկադիր կատարող Միհրան Պողոսյանի սույն թվականի նոյեմբերի 3-ի հրամանը և դեկտեմբերի 8-ից նախկին պաշտոնում վերականգնել ՀՀ ԱՆ ԴԱՀԿ ծառայության անձնակազմի կառավարման բաժնի պետ, արդարադատության գնդապետ Ռուբեն Մարտինի Միրաքյանին: Երեկվա մեկ այլ հրամանով նախարարը, ղեկավարվելով «Դատական ակտերի հարկադիր կատարումն ապահովող ծառայության մասին» Հայաստանի Հանրապետության օրենքի 35-րդ հոդվածի 1-ին մասի 1-ին կետով և 2-րդ մասով, ինչպես նաև հիմք ընդունելով ՀՀ կառավարության 2009 թվականի փետրվարի 19-ի «Դատական ակտերի հարկադիր կատարման ծառայողի վարքագծի կանոնները հաստատելու մասին» N 157-Ն որոշման հավելվածի 4-րդ կետի 11-րդ ենթակետը, կարգապահական տույժ է կիրառել գլխավոր հարկադիր կատարող Միհրան Պողոսյանի նկատմամբ և հայտարարել նկատողություն: «Առաջին լրատվականի» հարցին, թե ինչն է եղել Ռուբեն Միրաքյանին աշխատանքից հեռացնելու պատճառը, ԱՆ լրատվական ծառայության պետ Լանա Մշեցյանն ասաց, որ հեռացվածի և Միհրան Պողոսյանի միջև պարզապես ոչ պատշաճ խոսակցություն է եղել: Այլ մանրամասներ նա չհայտնեց:
