Իսլամիստ Մևլիդ Յաշարևիչի հանցագործության շարժառիթը, հնարավոր է, եղել է նախանձը ամերիկյան քաղաքականության նկատմամբ, հայտնում են սերբական ԶԼՄ-ները:
Ինչպես հայտնում է РИА Новости գործակալությունը, Յաշարևիչը հոկտեմբերի 27-ին «Կալաշնիկով» ինքնաձիգից կրակ էր բացել Սարաևոյում ԱՄՆ դեսպանատան ուղղությամբ: Ոստիկանական հատուկ գործողությունների արդյունքում նա ոտքից վիրավորվել էր և տեղափոխվել հիվանդանոց, որտեղ նրա նկատմամբ հսկողություն է սահմանվել:
Ահաբեկչության շարժառիթների մասին պաշտոնապես չի հայտարարվում:
Ինչպես հայտնում է բելգրադյան «Բետա» գործակալությունը, հղում կատարելով ականատեսների վկայություններին, Յաշարևիչը չի կրակել անցորդների վրա. նրա թիրախում դեսպանատան աշխատակիցներն էին, որոնց կոչ է արել դուրս գալ շենքից: Ականատեսների վկայությամբ` նա իր դժգոհությունն էր հայտնում, որ «ամերիկացիները սպանում են մուսուլմաններին ամբողջ աշխարհում»:
Հայտնի է, որ Յաշարևիչը սերբական Նովի-Պազար քաղաքում էր բնակվում, սերտ կապեր ուներ արմատական իսլամիստների հետ: Նրա մասնակցությամբ ամերիկացի դիվանագետների ներկայությամբ միջադեպ տեղի էր ունեցել նաև անցած տարի: 2005 թվականին Յաշարևիչին Ավստրիայի դատարանը դատապարտել էր երեք տարի ժամկետով ազատազրկման ավազակային հարձակման և 100 հազար եվրո կողոպուտի համար:
