Ֆրանսիացի արվեստաբան Ժիլ Պերոն հոկտեմբերի 27-ին հանդես է եկել 19-րդ դարին պատկանող «Վնասված կնոջ» արձանի մասին զեկույցով:
Ինչպես հաղորդում է Agence France-Presse-ը, ֆրանսիացին ենթադրում է, որ դրա հեղինակը քանդակագործ Օգյուստ Ռոդենն է:
Պերոյի խոսքով, որը Ռոդենի առաջատար մասնագետներից է, քանդակի յուրաքանչյուր «մկան» վկայում է, որ այն հեղինակել է Ռոդենը: Արվեստաբանի խոսքով`քանդակը պատկերում է Ռոդենի աշակերտուհի ու սիրուհի Կամիլ Կլոդելին, որը, ինչպես պնդում են քանդակագործի կենսագիրները, մի քանի անգամ կատարել է հղիության արհեստական ընդհատում:
Պատկերված կինը կարծես ծալվում է ցավից: Հենց մոդելի կանգնած դիրքն է, ըստ Պերոյի, ապացուցում, որ քանդակի հեղինակը Ռոդենն է: Նրա կարծիքով` դրա մասին են վկայում նաև ֆիգուրի հագուստը, ձեռքերի մատների միջև ընկած հեռավորությունը, ինչպես նաև շարժումները:
Ժ.Պերոն, ով քառորդ դար զբաղվում է քանդակի հետազոտմամբ, հայտարարել է, որ չի կասկածում իր հայտնագործությանը: Սակայն նրա հայտարարությանը կասկածամտորեն են վերաբերվել Ռոդենի փարիզյան թանգարանում: Թանգարանի մասնագետները հրաժարվել են անգամ ներկա գտնվել Պերոյի զեկույցին:
22,5 սանտիմետրանոց արձանի մասին առաջին տեղեկությունը մամուլում հայտնվեց 1980թ., երբ ինչ-որ մի հնավաճառ այն վաճառեց հնոտիների շուկաներից մեկում:
