Այսօր Հայաստանի ֆրանսիական համալսարանում Եվրոպական միության աջակցությամբ տեղի ունեցավ համաժողով՝ «Մարդու իրավունքները, ժողովրդավարությունը և օրենքի գերակայությունը որպես Եվրոպական միության հիմնարար արժեքներ» խորագրով:
Հայաստանում ԵՄ պատվիրակության Գործառնական բաժնի ղեկավար Ժան-Քրիստոֆ Գերանդն իր խոսքում տեղեկացրեց, որ իրենք սերտորեն համագործակցում են հայաստանյան հասարակական տարբեր կազմակերպությունների, Մարդու իրավունքների գրասենյակի հետ: Գերանդը տեղեկացրեց նաև, որ Հայաստանում իրենք աջակցում են մոտ 30 ծրագրի իրականացմանը․ նման ծրագրեր իրականացվում են նաև Ուկրաինայում, Մոլդովայում և Բելառուսում:
Նա նաև տեղեկացրեց, որ այս տարի նոյեմբերի 8-9-ը ԶԼՄ-ների ազատությանը նվիրված համաժողով են կազմակերպելու Ծաղկաձորում:
«Մարդու իրավունքների մասին այսօր խոսում են գրեթե բոլորը, խոսում են անգամ նրանք, ովքեր խախտում են դրանք»,- համաժողովի ընթացքում նման հայտարարությամբ հանդես եկավ ՀՀ մարդու իրավունքների պաշտպան Կարեն Անդրեասյանը:
Նա նշեց, որ շատ համբերություն է պետք՝ մարդու իրավունքների նկատմամբ հավատը չկորցելու համար: Մարդու իրավունքների պաշտպան Կարեն Անդրեասյանը նկատեց, որ մենք այսօր չենք կարող ասել, որ Հայաստանում մարդու իրավունքներն իրականում հարգված են բոլորի կողմից, բայց որ քայլ առ քայլ մոտենում ենք դրան և առաջընթաց է գրանցվում՝ ակնհայտ է:
Նա նաև հույս հայտնեց, որ այսօրվա քննարկմանը, խոսելով մարդու իրավունքների ու ժողովրդավարության մասին, մարդիկ անկեղծորեն կհավատան դրան:
ԵՄ փորձագետ, ֆրանկոֆոնիայի գծով Ֆրանսիայի նախագահի նախկին անձնական ներկայացուցիչ, Ֆրանսիայի Եվրոպական շարժման նախագահ, Մոնպելիեի ակադեմիայի ռեկտոր Քրիստիան Ֆիլիպը քննարկումից առաջ լրագրողների հետ զրույցում նշեց, որ նման քննարկումները նպատակ ունեն ցույց տալու, որ
եվրոպական համակարգ ստեղծելը հնարավոր է միայն որոշակի արժեքների հիման վրա: Նա նկատեց, որ թեև այժմ ԵՄ-ն դիտվում է որպես տնտեսական միավորում, սակայն այն հիմնված է մարդու իրավունքները ներկայացնող արժեքների վրա: Քրիստիան Ֆիլիպը նկատեց, որ ԵՄ երկրներին միավորող ամենակարևոր օրենքը ԵԽ Մարդու իրավունքների կոնվենցիան է, և քանի որ Հայաստանը ստորագրել է այն, ապա պետք է շարժվի հենց այդ կոնվենցիայով. «Մենք չենք ասում, որ ԵՄ-ն ժողովրդավարության մոդել է, բայց այն կարող է լավ օրինակ ծառայել»:
Հայաստանում ֆրանսիական համալսարանի ռեկտոր տիկին Ժոել լը Մորզելեկը լրագրողներին տեղեկացրեց, որ նման քննարկում լինելու է նաև դեկտեմբերին: