ՀՀ-ում «ժողովրդավարություն» բառը ձևի համար է օգտագործվում: «Առաջին լրատվական»-ի հետ զրույցում նման տեսակետ հայտնեց Կրպակատերերի պաշտպանության կազմկոմիտեի նախագահ Արևիկ Ղազարյանը`խոսելով այսօր կառավարության շենքի առջև ոստիկանության արգելքների մասին:
«Մենք շատ բացասական ենք վերաբերվում ոստիկանապետի այն հայտարարությանը, թե պետք է արգելվեն բողոքի ակցիաները, մենք դա մարդու իրավունքի ոտնահարում ենք համարում, քանի որ կառավարության շենքի առջև մարդիկ իրենց բողոքն են հայտնում, այլ ոչ խառնաշփոթ իրավիճակ են ստեղծում»,- ասաց Ա. Ղազարյանը` հավելելով, որ մարդիկ ցանկանում են, որ վերջապես կառավարությունը, նախագահը, պատկան մարմինները լսեն իրենց ձայնը, իսկ եթե իրենք չեն ցանկանում լսել, դա միայն նշանակում է, որ այս պետության մեջ «ժողովրդավարություն» բառը ձևի համար է ասվում:
Նշենք, որ այսօր կրպակատերերը դիմել են ՄԻՊ գրասենյակ և հայտնել, որ ոստիկանությունն իրենց թույլ չի տալիս իրենց ակցիան անցկացնել: «Եթե կառավարական հաջորդ հինգշաբթին էլ լինի այնպիսին, ինչպիսին եղավ այսօր, ես չգիտեմ ինչ պետք է անել»,- նշեց Կրպակատերերի պաշտպանության կազմկոմիտեի նախագահը` հաստատելով, որ շարունակելու են իրենց ակցիաները մինչև իրենց ձայնը տեղ հասնի:
