Հոկտեմբերի 27-ը միայն այդ ոճրագործությանը զոհ գնացածների ընտանիքների վիշտը և խնդիրը չէ, Հոկտեմբերի 27-ը մեր պետության չլուծված խնդիրն է: «Առաջին լրատվական»-ի հետ զրույցում նման տեսակետ հայտնեց «Ժառանգություն» կուսակցության պատգամավոր Ստեփան Սաֆարյանը:
«Եվ սա նախ այն առումով, որ քաղաքական համակարգում կարող է նման զազրելի քաղաքական հանցագործություն տեղի ունենալ, ինչն ուղղակի կարող է բերել իշխանության ուզուրպացիայի ու նաև պետությունը կարող է անունակ լինել սեփական հասարակությանն ասելու ողջ ճշմարտությունը: Հոկտեմբերը 27-ը, որպես չբացահայտված և շատ խոշոր հանցագործություն, ավաղ, նախակարապետ է բազմաթիվ այլ չբացահայտումների համար»,- նկատեց Ստեփան Սաֆարյանը:
Հարցին` կարծո՞ւմ է, որ Հոկտեմբերի 27-ի ոճրագործությունը մի օր, այնուամենայնիվ, կբացահայտվի և մեղավորները կպատժվեն, խորհրդարանականը պատասխանեց. «Իհարկե կլինի այդ օրը, իհարկե կլինի ճշմարտության պահը, բայց հանուն պետականության ապագայի` որքան այդ պահը շուտ լինի, այնքան ավելի լավ: Միաժամանակ, այս իշխանությունների հետ հույս չեմ փայփայում, որ նրանք ասելու են ճշմարտությունը: Նրանք անգամ նվազագույն անմեղ բաների` ապրանքների գների թանկացում և այլնի մասին ճշմարտությունը չեն ասում, ինչ մնաց նման մի ոճրագործության, որի հետ առնչություն ունենալու մեջ կասկածները հանրության շրջանում համատարած են առ երկրորդ նախագահը»,- ամփոփեց պատգամավորը:
Նշենք, որ 12 տարի առաջ հոկտեմբերի 27-ին ահաբեկիչների խումբը՝ Նաիրի Հունանյանի գլխավորությամբ, ներխուժեց Հայաստանի Ազգային ժողովի նիստերի դահլիճ և դիմահար կրակոցներով սպանեց կառավարության և խորհրդարանի անդամներին:
Ահաբեկչության զոհ դարձան երկրի վարչապետ Վազգեն Սարգսյանը, խորհրդարանի խոսնակ Կարեն Դեմիրճյանը, ԱԺ փոխնախագահներ Յուրի Բախշյանն ու Ռուբեն Միրոյանը, օպերատիվ հարցերի նախարար Լեոնարդ Պետրոսյանը, խորհրդարանի պատգամավորներ Արմենակ Արմենակյանը, Հենրիկ Աբրահամյանը և Միքայել Քոթանյանը:
Ահաբեկիչների նկատմամբ դատավարությունը տևեց 2001-2003 թվականները: 6 ահաբեկիչները, այդ թվում նրանց ղեկավար Նաիրի Հունանյանը, նրա եղբայր Կարեն Հունանյանը, քեռին՝ Վռամ Գալստյանը, Դերենիկ Բեջանյանը, Էդիկ Գրիգորյանը և Աշոտ Կնյազյանը դատապարտվեցին ցմահ ազատազրկման: Համլետ Ստեփանյանը դատապարտվեց 14 տարվա ազատազրկման:
