News Georgia-ի փոխանցմամբ՝ Վրաստանում ԱՄՆ դեսպան Ջոն Բասսը հայտարարել է, որ դեռևս վաղ է խոսել, թե արդյոք 2012 թվականին Չիկագոյում կայանալիք ՆԱՏՕ-ի գագաթնաժողովում Վրաստանին կտրամադրվի՞ ՆԱՏՕ-ին անդամակցելու վերաբերյալ գործողությունների պլան.
«Չիկագոյի գագաթնաժողովից 6 ամիս առաջ ես չեմ կարող կանխատեսումներ անել, թե ինչպիսի հարցեր կքննարկվեն, իսկ ինչպիսիք՝ ոչ։ Վրաստանը կարևոր գործընկեր է, այն կարևոր ներդրում է ունեցել Աֆղանստանում տարվող խաղաղապահ գործողություններում, որոնք ծառայում են ընդհանուր անվտանգությանն ու մարտահրավերների հաղթահարմանը»։
Իսկ Վրաստան այցելած Հարավային Կովկասում ու Կենտրոնական Ասիայում ՆԱՏՕ-ի ներկայացուցիչ Ջեյմս Ափաթուրայը Թբիլիսիում տեղի ունեցած անվտանգության ու պաշտպանության կոնֆերանսում հայտարարել է, որ ՆԱՏՕ-ի չափորոշիչներին համապատասխանելու համար Վրաստանը պետք է ակտիվորեն բարեփոխումներ անցկացնի երկրի ժողովրդավարացման ուղղությամբ և կատարելագործի իր զինված ուժերը.
«Այդ ուղղությամբ մենք օգնում ենք Վրաստանին, և այդ նպատակով ստեղծել ենք ՆԱՏՕ-Վրաստան հանձնաժողով, ինչպես նաև իրագործում ենք ամենամյա նախագծեր։ Հուսով եմ, որ այդ ամենը Վրաստանին կմոտեցնեն ՆԱՏՕ-ին»։
Հիշեցնենք, որ ՆԱՏՕ-Վրաստան հանձնաժողովը ստեղծվել է 2008 թվականի սեպտեմբերին` որպես քաղաքական խորհրդատվության ու գործնական համագործակցության ֆորում, որը նպաստելու է ՆԱՏՕ-ին Վրաստանի անդամակցությանը:
