Ադրբեջանական Turan լրատվական գործակալության փոխանցմամբ՝ հետախուզական և անվտանգության ոլորտում մասնագիտացած իսրայելական Debkafile կայքը հայտնել է, որ սեպտեմբերի 12-ին Լեռնային Ղարաբաղում ադրբեջանական անօդաչու թռչող սարքը (ԱԹՍ) վայր են գցել ոչ թե հայկական զինված ուժերը, այլ՝ ռուսական զորամիավորումը, որը հատուկ տեխնիկա է կիրառել դրա համար։
Debkafile կայքը, վկայակոչելով իր ռազմական աղբյուրներին, հայտնում է, որ, չնայած իսրայելա-ադրբեջանական ռազմական համագործակցության հանդեպ Ռուսաստանի և Իրանի նյարդային վերաբերմունքին, ԱԹՍ-երի մատակարարումը շարունակվում է։
Առաջիկա երկու ամիսներին ադրբեջանական բանակը համալրվելու է երկու տիպի 60 ԱԹՍ-երով։ Դրանցից մեկը 2М Orbiter ԱԹՍ-ն է, որը կարող է բարձրանալ 4-6 կիլոմետր և օդում գտնվել մինչև 5 ժամ, իսկ մյուսը Aerostar ԱԹՍ-ն է, որի համապատասխան ցուցանիշներն են մինչև 10 կիլոմետր և 12 ժամ։ Օրակարգում է գտնվում այդ ԱԹՍ-երի սպառազինումը ղեկավարվող մինի հրթիռներով, ինչն արդյունավետորեն կիրառում է իսրայելական բանակը։
Debkafile կայքը, վկայակոչելով իր արևմտյան հետախուզական ապարատներին, հայտնում է, որ Իսրայելն ու Ադրբեջանը նաև լրջորեն քննարկում են իսրայելական ռազմական լրտես արբանյակների վաճառքը։ Իրանական աղբյուրները պնդում են, որ Իսրայելն արդեն իսկ Կասպից ծովի ափին՝ Ադրբեջանի տարածքում, տեղակայել է հատուկ ռադիոտեղորոշիչ կայան, որը նախատեսված է մեծ տարածության դիտարկման համար։ Դա հիմնականում վերաբերում է Իրանի միջուկային օբյեկտներին։
