Բրյուսելում կայացած ԵՄ-Հայաստան խորհրդարանական համագործակցության հանձնաժողովի նիստում ընդունված հայտարարության մեջ կարեւորվում է նաեւ մարտի 1-ի զոհերի մահվան հանգամանքների բացահայտելը: Ուշագրավ է, որ այդ հայտարարության մեջ ոչ մի խոսք չկա քաղբանտարկյալների մասին: Ինչ վերաբերում է մարտի 1-ի զոհերի սպանությունների հանգամանքների բացահայտման կարեւորությանը, ապա ԱԺ եվրաինտեգրման հարցերի մշտական հանձնաժողովի նախագահ, հայկական պատվիրակության ղեկավար Նաիրա Զոհրաբյանը նշել է, որ այդ ձեւակերպումներն իրենք են առաջարկել, քանի որ կարեւորում են այդ փաստը: «Առաջին լրատվականը» «Հանրապետություն» կուսակցության քաղխորհրդի անդամ, Հայ ազգային կոնգրեսում «Մարտի 1-ի դեպքերը հետաքննող հանձնախմբի» անդամ Սուրեն Աբրահամյանից հետաքրքրվեց, թե ինչու են եվրոպական կառույցները շարունակում մարտի 1-ի ողբերգական դեպքերի հետ կապված լղոզված դիրքորոշում ցուցաբերել այն դեպքում, երբ ՀԱԿ-ը բազմաթիվ փաստաթղթեր է ուղարկել այդ կառույցներին, որոնք վկայում են իշխանության ապօրինի գործողությունները: Սուրեն Աբրահամյանն ի պատասխան մեր հարցի` արձագանքեց, որ մարտի 1-ը ոչ թե պատճառ է, այլ`2008 թ. ՀՀ Նախագահի` խայտառակ ձեւով կեղծված ընտրությունների հետեւանք: Մեր զրուցակիցը եվրոպացիների նման դիրքորոշումը պայմանավորում է ժամանակին հենց այդ կեղծված ընտրությունների վրա աչք փակելով, որն էլ ստիպում է նրանց գործարքի մեջ մտնել ՀՀ իշխանությունների հետ: