«Մանկական Եվրատեսիլ-2011»-ի տոմսերն արդեն վաճառվում են քաղաքի երեք տոմսարկղերում: Այս մասին «Առաջին լրատվական»-ին հայտնեց «Մանկական Եվրատեսիլ» հայկական պատվիրակության մամուլի քարտուղար Արտակ Վարդանյանը`մանրամասնելով, որ տոմսերը վաճառվելու են «Մոսկվա» կինոթատրոնի, «Անի Պլազա» հյուրանոցի և ֆիլհարմոնիայի տոմսարկղերում: Տոմսերն, ըստ Ա. Վարդանյանի, վաճառվելու են երկու օրվա համար` դեկտեմբերի 2-ին կայանալիք գլխավոր փորձի և հաջորդ օրը` բուն մրցույթի:
«Դեկտեմբերի 2-ին լինելու է մրցույթի նույն հիմնական շոուն, մրցութային և համերգային ծրագիրը՝ հանդիսատեսով, բայց դա չի հեռարձակվելու, այլ լինելու է հիմնական փորձ, որը սովորաբար լինում է այս մրցույթում: Այդ օրվա տոմսերն արժեն 3,5 եվրոյից մինչև 22, իսկ դեկտեմբերի 3-ի տոմսերը` 9-55 եվրո»,- տեղեկացրեց մրցույթի հայաստանյան պատվիրակության մամուլի քարտուղարը:
Ա.Վարդանյանը նաև ասաց, որ տոմսերի բարձր որակը և անվտանգությունն ապահովելու նպատակով կազմակերպիչների նախաձեռնությամբ տոմսերը պատրաստվել են արտերկրում: Այն հարցին, թե ինչո՞ւ են վաճառվում նաև գլխավոր փորձի տոմսերը՝ պատասխանեց, որ մրցույթը հեռարձակվում է բազմաթիվ եվրոպական երկրներում և պատասխանատվությունը մեծ է, այն նույնպես հանդիսատեսով է անցկացվում:
«Այդ օրը հավաքվում է այն հանդիսատեսը, որը շատ է սիրում «Եվրատեսիլը» կամ՝ ում պարզապես հետաքրքիր է, թե ինչ շոու է պատրաստվել, այսինքն` ավելի ետնաբեմային տարբերակը»,- նշեց Արտակ Վարդանյանը` ընդգծելով, որ «Եվրատեսիլ» մրցույթում դա ոչ թե ավանդույթ է, այլ ընդունված կարգ:
Նշենք, որ դեկտեմբերի 3-ին կայանալիք մրցույթը հեռարձակվելու է Եվրոպական հեռարձակողների միության երկրների բոլոր ալիքներով և հանրային հեռուստատեսության ուղիղ եթերով: Հայաստանն այդ մրցույթում ներկայացնելու է Դալիթան՝ Welcome to Armenia երգով:
