ՀՀ ներկրված բենզինի մակնշման և օգտանային թվի անհամապատասխանությունները երկրում բազմաթիվ են, կան նաև չափաքանակի հետ կապված խնդիրներ: Ինչպես այսօր ԱԺ-կառավարություն հարցուպատասխանի ժամանակ հայտարարեց ՕԵԿ պատգամավոր Հովհաննես Մարգարյանը, Էկոնոմիկայի նախարարությանն ուղղած իրենց նամակին պատասխանել են, որ Սպառողների շահերի պաշտպանության տեսչությունն իրականացնում է վերահսկողություն և հայտնաբերված չափագրման ու մակնշման խախտումները վերացվել են:
Էկոնոմիկայի նախարար Տիգրան Դավթյանը նշեց, որ շուկայի վերահսկողության տեսչության կարողությունները լրջորեն ուժեղացվում են. «Վարչական տույժերի ենթարկված սուբյեկտների մոտ խախտումները վերացել են, բայց տնտեսվարողներ կան, որոնց մոտ ռիսկերն ակնհայտ են»:
Նախարարը հայտնեց, որ հանձնարարական է տրվել տեսչությանը. հաշվի առնելով ոլորտի զգայուն լինելը և որ այն առնչվում է սպառողների շահերին՝ ավելի ընդգրկուն ստուգումներ անցկացնել, նաև խստացվել են տեխնիկական կանոնները: Տ.Դավթյանը վստահեցրեց, որ առաջիկայում հարցի սրությունը կմեղմվի:
