Ադրբեջանական APA լրատվական գործակալության փոխանցմամբ՝ սահմանագծման վերաբերյալ վրաց-ադրբեջանական բանակցությունները տեղի են ունենալու հաջորդ ամիս։ Այս մասին հայտարարել է Ադրբեջանի արտգործնախարար Էլմար Մամեդյարովը։
Վերջինիս խոսքերով՝ այդ բանակցությունները տեղի են ունենալու Վրաստանում։ Մամեդյարովն ընդգծել է, որ վրաց-ադրբեջանական սահմանի 2/3-ի սահամագծումն ավարտված է։
Ադրբեջանում գտնվող Վրաստանի արտգործնախարար Գրիգոլ Վաշաձեն իր հերթին հայտարարել է, որ վրաց-ադրբեջանական պետական սահմանի սահմանագծումը երբեք չի բարդացրել և չի կարող բարդացնել երկու երկրների հարաբերությունները.
«Սահմանագծման հարցն աշխատանքային հարց է։ Այդ գործընթացն ընթանում է, այն համբերատարություն է պահանջում, քանի որ այն փորձագետների մակարդակով մանրակրկիտ աշխատանք է ենթադրում»։
Հիշեցնենք, որ վրաց-ադրբեջանական պետական սահմանի երկարությունը կազմում է 480 կիլոմետր։ Երկու երկրների միջև սահմանագծման աշխատանքները մեկնարկել են դեռևս 1996 թվականին։ Ներկայիս դրությամբ՝ համաձայնեցված է ընդհանուր սահմանի 300 կիլոմետրանոց հատվածը։
