Հաշմանդամություն ունեցող անձինք, մշակութային, հասարակական և քաղաքական ճանաչված գործիչներ, Մարդու իրավունքների պաշտպան Կարեն Անդրեասյանի ուղեկցությամբ, փորձեցին հասարակական տրանսպորտով հասնել Երևանի քաղաքապետարան և իրենց ուղերձը փոխանցել քաղաքապետին: Ակցիան, որի նպատակն էր ցույց տալ, որ ՀՀ-ում հաշմանդամություն ունեցող մարդկանց համար մատչելի հասարակական տրանսպորտի կարիք կա, կազմակերպվել էր հաշմանդամություն ունեցող անձանց իրավունքների պաշտպանությամբ զբաղվող հասարակական կազմակերպությունների և Մարդու իրավունքների պաշտպանի աջակցությամբ:
«Այսօր մեր նպատակը մեկն է` փորձել և տեսնել` հնարավո՞ր է հաշմանդամություն ունեցող անձի համար Երևանում գործող երթուղային միջոցներից օգտվելը: Մենք տեսականորեն իհարկե պատկերացնում ենք, որ դա գրեթե անհնար է, բայց ցանկացանք փորձել և այդ փորձի արդյունքում ցույց տալ, թե ինչպիսի դժվարություններ են ունենում այն մարդիկ, ովքեր ունեն հաշմանդամություն»,- մեկնաբանեց ՄԻՊ Կարեն Անդրեասյանը` հավելելով, որ հետո մտահոգությունները ուղերձի տեսքով հանձնելու են քաղաքապետարան, որպեսզի իրենք ավելի ուշադիր լինեն և առաջիկայում կոնկրետ հնարավորություններ տան հաշմանդամություն ունեցող մարդկանց՝ օգտվելու տրանսպորտից: Ըստ ՄԻՊ-ի` առայժմ փորձում են խնդրի վրա ուշադրություն հրավիրել, հետո նաև հանդես կգանք համապատասխան առաջարկներով:
Ինչ վերաբերում է ՄԻՊ գրասենյակի շենքի՝ հաշմանդամություն ունեցող մարդկանց հարմարեցվածությանը, նա ասաց, որ կան թեքահարթակներ, բայց վերևի հարկեր մարդկանց փոխադրելու համար հնարավորություններ դեռ չկան: ՄԻՊ-ը, գրասենյակի աշխատողները, հասարակական կազմակերպությունների անդամները, մտավոր և ֆիզիկական հաշմանդամություն ունեցող անձինք Հանրապետության հրապարակից շարժվեցին` փորձելով գտնել դեպի քաղաքապետարան ամենահարմար առաջին կանգառը, որպեսզի հասնեն քաղաքապետարան: ՄԻՊ Կարեն Անդրեասյանը ևս երեք անձանց օգնությամբ փորձեց հաշմանդամություն ունեցող սայլակով երիտասարդին բարձրացնել երթուղային ավտոբուս, սակայն այն շատ նեղ էր սայլակի համար. փորձը ձախողվեց, ուստի ակցիայի կազմակերպիչները որոշեցին երթով շարունակել ճանապարհը դեպի քաղաքապետարան:
Քաղաքապետարանում ուղերձը ակցիայի մասնակից «Ունիսոն» ՀԿ ղեկավար Արմեն Ալավերդյանից ընդունեց Երևանի քաղաքապետարանի տրանսպորտի վարչության պետ Հենրիկ Նավասարդյանը` վստահեցնելով, որ այս խնդրով անհանգստացած են նաև իրենց կառույցում: «Շուտով քաղաքում կլինեն այնպիսի երթուղայիններ, որոնք մեխանիկական միջամտությամբ կհարմարեցվեն հաշմանդամություն ունեցող անձանց համար»,-հավաստիացրեց Հ. Նավասարդյանը։
