Այսօր Հանրային խորհրդում քննարկվեց 2012 թ. պետբյուջեով նախատեսվող՝ հարկային մուտքերը 101 մլրդ դրամով ավելացնելու հարցը և դրա ազդեցությունը տնտեսության վրա: ՀԽ նախագահ Վազգեն Մանուկյանը հայտնեց, որ նիստին հրավիրված են եղել նաև ներկայացուցիչներ էկոնոմիկայի և Ֆինանսների նախարարություններից, սակայն, պատասխանելով, որ դեռ վաղաժամ է նման քննարկում անելը, նրանք հրաժարվել են մասնակցել:
Վ. Մանուկյանը դրական գնահատեց պրոգրեսիվ հարկման համակարգի ներդրումը, սակայն նշեց, որ կան ոլորտներ, որտեղ իսկապես կա գերշահույթ, նրանց վճարումներն ավելացնում են, բայց դա տարածվում է հաճախորդների վրա, այսինքն՝ գների բարձրացում է ստացվում: ՀԽ նախագահը անընդունելի անվանեց այն, որ տարեվերջին կատարվում են հարկային փոփոխություններ, որոնք ուժի մեջ են մտնում տարեսկզբից և գործարարները չեն հասցնում ծանոթանալ դրանց ու համապատասխան միջոցներ ձեռնարկել:
ՀԽ Ֆինանսատնտեսական և բյուջետային հարցերի հանձնաժողովի նախագահ Վազգեն Սաֆարյանի խոսքով՝ ակցիզային հարկերի փոփոխությունները եթե այդպես մնան, ապա որոշակի առավելություն կտրվի ներկրվող ապրանքներին. «Մենք շարունակ պետք է ձգտենք, որ մեր հարկերում անուղղակի հարկերի տոկոսները փոքրանան և մեծանան ուղղակի հարկերը՝ եկամտահարկը և շահութահարկը: Այս փոփոխություններում որոշակի միտում այդ իմաստով նկատվում է»:
Վ. Սաֆարյանը դրական համարեց նաև մինչ 2 տարվա ժամկետի թողարկման, 200 ձիաուժ ունեցող ավտոմեքենաների հարկերի ավելացումը: Սակայն, ըստ նրա, դրական չեն ակցիզային հարկի և մաքսատուրքերի հետ կապված փոփոխությունները. «Մի շարք ապրանքներ, որ չէին ընկնում մաքսատուրքի տակ, այժմ հարկվելու են: Սա վիճահարույց է, որովհետև տեղական արտադրողականության բարձրացման համար պետք է կիրառվի ներդրողական քաղաքականություն, որը բյուջեում չկա:
Հարկեր/ՀՆԱ հարաբերակցությունը 17.36% է, և պետք է ստվերային տնտեսությունը կրճատելու քաղաքականություն տանենք, մինչդեռ այս փոփոխությունները ոչ այնքան ուղղված են ստվերի կրճատմանը, որքան նոր հարկատեսակներով կփորձեն ավելի շատ հարկային մուտքեր բերել, որը նշանակում է մեծացնել հարկային ճնշումը, իսկ դա նշանակում է, որ հարկային դաշտը փոքրանալու է»:
ՀԽ ֆինանսաբանկային հանձնաժողովի անդամ Սեյրան Սարգսյանը նկատեց, որ աշխատավարձերի ոլորտում հարկման պրոգրեսիվ համակարգ ներդնելու դեպքում աշխատավարձերի մեծ մասը կանցնի ստվեր, և շրջանառության մեջ կդրվեն ծրարները:
