Դեռ հուլիս ամսին Պոլսո պատրիարքարանում տեղի ունեցած ընտրությունների ժամանակ Պոլսո հայոց պատրիարքի տեղապահ, արքեպիսկոպոս Արամ Աթեշյանի` Պոլսո պատրիարքական փոխանորդ ընտրվելու փաստը հայկական համայնքում խիստ դժգոհություններ առաջացրեց, քանի որ Արամ Աթեշյանը բարիդրացիական հարաբերությունների մեջ է թուրքական իշխանությունների հետ և չի կարող համայնքի խնդիրները վեր հանել, համայնքի շահերը պաշտպանել: Օրերս «Մենք ենք ուզում ընտրել մեր պատրիարքին» նախաձեռնող խմբի անդամները մամուլի ասուլիսի ժամանակ բարձրաձայնեցին իրենց մտահոգությունները։ Նրանք մասնավորապես հանդես են եկել պահանջով, որ թուրքական կառավարությունը պետք է թույլ տա անցկացնել պատրիարքի ընտրություններ, և որ Արամ Աթեշյանը համայնքի խնդիրները չի կարողանում վեր հանել: Նախաձեռնող խումբը պահանջում է ապահովել իրենց ընտրելու իրավունքը, անգամ ստորագրահավաք են կազմակերպել, որին այս պահի դրությամբ մասնակցել է 5000 մարդ: «Ակոս» թերթի հայկական էջերի պատասխանատու Սարգիս Սերոբյանից հետաքրքրվեցինք`այս պահին ի՞նչ է տեղի ունենում համայնքում, ի՞նչ տրամադրություններ են: Ըստ նրա`ժողովրդի մեջ մեծ աղմուկ կա, ստորագրահավաք է սկսվել, որպեսզի որոշվի պատրիարքի ընտրություն անցկացնել, թեև նշում է, որ պատրիարքարանի կրոնական ժողովի կողմից այդ հարցը լուծվել է. նրանք որոշել են, որ այլևս պատրիարքի ընտրության հարկ չկա, և Արամ Աթեշյանին ընտրել են որպես պատրիարքական ընդհանուր փոխանորդ. Սա, ի դեպ, պատմության մեջ առաջին անգամ է կատարվում հոգևորականների միջոցով, այլ ոչ թե ժողովրդի ձայներով, ինչը իրականում ժողովրդի իրավունքի խախտում էր նշանակում: Մյուս կողմից էլ, Սարգիս Սերոբյանի խոսքերով`Արամ Աթեշյանը, պատրիարքական աթոռին բազմելով, պաշտոնապես պատրիարքի բոլոր իրավունքներն իր ձեռքն է վերցրել։ Անգամ պատրիարքից ավելի շատ իրավասություններ է իր վերագրել, քանի որ պատրիարքարանի հաշվեքննիչ մարմնի իրավասություններն էլ է իր ձեռքը վերցրել և իրեն իրավասու է համարում պատրիարքարանի բոլոր գործերը միանձնյա վարել։ Սա էլ ժողովրդի նման մեծ դժգոհությունն ու պահանջն է առաջ բերում: Հարցին` իսկ Աթեշյանի` այսքան մեծ իրավունքներ իրեն վերագրելը արդյոք չի՞ պայմանավորում թուրքական կառավարության հետ սերտ հարաբերություններով, Սարգիս Սերոբյանը պատասխանեց, թե չգիտի` ի՞նչ հարաբերությունների մեջ են Աթեշյանն ու թուրքական իշխանությունները, չի ուզում այդպիսի բան ասել մեկի մասին, որն այսօր հայերի պատրիարքական ընդհանուր փոխանորդն է, թեև նշեց, թե, քանի որ պետությունը իր գաղափարներին մոտ էր պամարում Արամ սրբազանի մտածելակերպը, կարող ենք ասել՝ այո՛, դրա համար նշանակեց նրան: Իսկ նախաձեռնության արդյունքը՝ 5000 հոգու ստորագրությունը, նշանակում է, որ ժողովրդի մեծ մասը նոր պատրիարքի ընտրության կողմնակից է. «Պատրիարքարանը, կրոնական ժողովի հոգևականները պետք է հասկանան դա և ընտություն կազմակերպեն։ Եթե մենք ընտրության որոշումը տանք, պետությունը դրա դեմ չի գնա, բայց քանի որ չկարողացանք որոշել` պատրիարքարանը նշանակեց Արամ սրբազանին»: