Համացանում տարածվել է մի տեսագրություն, որը, The Sun և The Daily Mail ամսագրերի պնդմամբ, ապացուցում է, որ Երկրի վրա այլմոլորակայիններ են շրջում: Տեսագրությունն արվել է բրիտանացի զբոսաշրջիկների կողմից Ամազոնի անտառներում: Հոլովակում երևում է, որ զբոսաշրջիկները լուսանկարում են տեղի երեխաներին, իսկ կադրի հետին պլանում նշմարվում է տարօրինակ փայլող շրջանակ, ծառերի արանքից էլ` այլմոլորակային:
Բրիտանացիների նկարած հոլովակը գրավել է պարանորմալ երևույթների սիրահարների շրջանում հայտնի Մայքլ Քոենի ուշադրությունը: Նա, չգիտես ինչու, անմիջապես որոշել է, որ հոլովակը կեղծ չէ: «Սրանք չափազանց հետաքրքիր կադրեր են, որոնք դժվար կլինի հերքել»,- ասել է նա:
Քոենը նշել է, որ տեսահոլովակը նկարահանվել է մի տարածաշրջանում, որը բնորոշվում է ՉԹՕ-ների բարձր ակտիվությամբ: Ուֆոլոգի կարծիքով` եկվորներին ամենայն հավանականությամբ հետաքրքրել է խոնավ արևադարձային անտառների տեսակային բազմազանությունը:
Այժմ Քոենին շրջապատել են հոլիվուդյան պրոդյուսերները, որոնք ցանկանում են բացառիկ կադրերն օգտագործել իրենց ֆիլմերում:
Որոշ կասկածամիտներ «այլմոլորակայինի» տեսքի մեջ, այնուամենայնիվ, տարօրինակ են համարում անշարժ տեսքը: Կադրում, այսպես կոչված, եկվորը հազիվ է շարժում գլուխը, իսկ կապույտ շրջանակի փայլն ամբողջ ընթացքում չի փոխվում: Ոմանք ենթադրում են, որ դա լուսարձակի լույս է, իսկ «եկվորը» պարզապես տիկնիկ է եղել: Այլ խոսքերով` ամեն ինչ հնարված է:
