Թուրքական Yeni Asır թերթի փոխանցմամբ՝ Թուրքիայի էներգետիկ և բնական պաշարների նախարար Թաներ Յըլդըզը հայտարարել է, որ իրենք մտադիր են մինչև 2023 թվականը (Թուրքիայի Հանրապետության հիմնադրման 100-ամյակը) ավարտին հասցնել երկրի տարածքում ածխաջրածինների հետախուզման աշխատանքները.
«Այդ տեսանկյունից ամենահետաքրքրական ու կարևոր տեղը սևծովյան տարածաշրջանն է։ Տվյալ տարածաշրջանում նավթային խոշոր ընկերությունները համապատասխան աշխատանքներ են իրականացնում»։
Հիշեցնենք, որ ավելի վաղ թուրքական կողմը երկու հորատում էր իրականացրել Սև ծովի արևմտյան և կենտրոնական հատվածներում, սակայն ոչինչ չէր հայտնաբերվել։ Դրանից հետո թուրքական կողմի հույսը Սև ծովի արևելյան հատվածն է։
Ի դեպ, այս տարվա ապրիլի կեսերին հայտնի դարձավ, որ Թուրքիայի նավթային պաշարները սպառվելու են 17 տարի անց: Թուրքիայի հասանելի նավթային պաշարները գնահատվում են 291.5 միլիոն բարել (43.14 միլիոն տոննա): Իսկ գազային պաշարները գնահատվել են 6.2 միլիարդ խորանարդ մետր:
Նախորդ տարի Թուրքիայում արդյունահանվել է 2.5 միլիոն տոննա նավթ և 726 միլիոն խորանարդ մետր գազ: Վերջին 10 տարվա ընթացքում Թուրքիայում նավթի արդյունահանումն ընկել է 3.2 տոկոսով:
