Աշխարհում կաշառքների տարեկան ծավալը կազմում է 1 տրլն դոլար: Այս մասին հայտարարել են ՄԱԿ-ի Կոռուպցիայի դեմ կոնֆերանսի մասնակիցները Մարոկկոյի մայրաքաղաք Մարաքեշում տեղի ունեցած կազմակերպության անդամ-երկրների չորրորդ կոնֆերանսի ժամանակ:
Ինչպես հաղորդում է ИТАР-ТАСС-ը, ֆորումում նշվել է, որ «այսօրվա դրությամբ կոռուպցիան գլոբալ մակարդակի լուրջ խնդիր է, որը սրում է անհավասարությունը և անարդարությունը, սպառնալիքի տակ է դնում տարբեր հաստատությունների աշխատանքների արդյունավետությունը, ժողովրդավարության և իրավական պետության գործունեությունը, ինչպես նաև խաթարում է կայունությունը հատկապես աշխարհի առավել խոցելի տարածաշրջաններում»:
Կոնֆերանսի մասնակիցները կոչ են արել «միավորել ջանքերը կոռուպցիայի դեմ պայքարում»` ընդգծելով, որ այն «աջակցություն է պահանջում պետական մարմինների, մասնավոր սեկտորի, քաղաքացիական հասարակության, զանգվածային լրատվության միջոցների և ոչ կառավարական կառուցվածքների կողմից»:
Մարաքեշի կոնֆերանսին մասնակցել են աշխարհի 150 երկրներից ավելի քան 1500 պատվիրակներ, կրոնական և միջազգային կազմակերպությունների ներկայացուցիչներ: Կազմակերպիչներն իրենց գլխավոր խնդիրն են համարում «մշակել կոռուպցիայի ծավալների կրճատմանն ուղղված գործողությունների գործնական և արդյունավետ ծրագիր»:
