Գերմանական Volkswagen AG (VW) ավտոկոնցեռնը, զարգացող շուկաներում իր բարձր ցուցանիշների շնորհիվ, ընթացիկ տարում կարող է դառնալ աշխարհի ամենախոշոր ավտոարտադրողը` շրջանցելով Toyota Motor Corp. և General Motors Co.-ին: Այս մասին հայտնում է Bloomberg գործակալությունը:
Մասնավորապես, Volkswagen-ի վաճառքի ծավալները ընթացիկ տարում կարող են աճել 13%-ով` հասնելով 8.1 մլն միավորի: Այն 2010թ. տվյալներով աշխարհի երրորդ խոշոր ավտոարտադրողն է: General Motors-ը կպահպանի երկրորդ հորիզոնականը, իսկ Toyota-ն, որը երեք տարիների ընթացքում առաջատար է եղել, կարող է հայտնվել երրորդ հորիզոնականում:
Volkswagen-ի վաճառքի ծավալների աճի հիմնական գործոններից մեկը փորձագետները համարում են հաջող գործունեությունը զարգացող երկրների տարածքում: J.D. Power & Associates-ի փորձագետների հաշվարկներով` ընկերության արտադրության վաճառքի ծավալներն ընթացիկ տարում Չինաստանում կարող են աճել գրեթե 20%-ով` հասնելով 2.3 մլն միավորի, իսկ Հնդկաստանում կրկնակի՝ հասնելով 116 հազար միավորի: Այսպիսով, Հնդկաստանին և Չինաստանին բաժին է ընկնում ընկերության ավտոմեքենաների վաճառքի ընդհանուր ծավալի մեկ երրորդը: Մինչդեռ Toyota-ն Թաիլանդի ջրհեղեղների պատճառով դադարեցրել է արտադրությունը Հարավարևելյան Ասիայի երկրներում:
Փորձագետները, սակայն, չեն բացառում, որ արդեն հաջորդ տարի Toyota-ն կարող է վերականգնել կորցրած դիրքերը:
Volkswagen AG-ն Եվրոպայի ամենախոշոր ավտոարտադրող ընկերությունն է: Այն միավորում է այնպիսի մակնիշներ, ինչպիսիք են Volkswagen-ը, Audi-ն, Skoda-ն, SEAT-ը:
