Թուրքական Dünya Bülteni կայքի փոխանցմամբ՝ երեկ ցերեկը Վանի նահանգում տեղի ունեցած ավերիչ երկրաշարժը վնասել է հազարավոր տներ։ Փլվել են 4 տարի առաջ ժամանակակից տեխնոլոգիաներով կառուցված շինությունները, մինչդեռ 444 տարի առաջ կառուցված մզկիթը չի վնասվել։
Ավելին՝ նշվում է, որ 1567 թվականին Վանի բեյլերբեյ (նահանգապետ) Հյուսրև փաշայի օրոք կառուցված տեղական մզկիթը նախկինում վերապրել է ավելի ուժգին երկրաշարժեր և չի վնասվել։ Մզկիթը կառուցել է հայազգի ճարտարապետ Միմար Սինանը։
Հիշեցնենք, որ Միմար Սինանն Օսմանյան արքունիքի գլխավոր ճարտարապետ է դարձել 1539 թվականին: Նրան են վերագրում շուրջ 360 շինության կառուցում. միայն Թուրքիայում նա կառուցել է 81 մեծ և 50 փոքր մզկիթ, 55 մեդրեսե (հոգևոր դպրոց), 19 դամբարան, 7 գրադարան, 14 մինարեթ, 3 հիվանդանոց, 8 կամուրջ, 5 ջրանցք, 17 քարվանսարայ, 31 պալատ, 35 բաղնիք, պահեստներ և այլն։
