ԱԺ-ն այսօր նիստում քննարկվեց «Գույքահարկի մասին» ՀՀ օրենքում լրացումներ կատարելու մասին», «Հողի հարկի մասին» ՀՀ օրենքում լրացումներ կատարելու մասին» և «ՀՀ հողային օրենսգրքում լրացումներ» կատարելու մասին» օրենքների նախագծերի փաթեթը, որով արտոնություններ են տրամադրվում Հայ Առաքելական եկեղեցու գույքահարկի և հողի հարկի գծով:
Տարածքային կառավարման և տեղական ինքնակառավարման հարցերի մշտական հանձնաժողովի նախագահ Հովհաննես Մարգարյանը տեղեկացրեց, որ եկեղեցուց 286 անուն պարունակող ցանկ են ստացել, թե որ հուշարձաններին է վերաբերում արտոնությունը, և ինչ սուբյեկտների պետք է տրվեն: Նա նշեց, որ 459 հուշարձանների անվանացանկ կա, որ դեռ պետք է հանձնվեն եկեղեցուն: Արշակ եպիսկոպոս դիվանապետը գրությամբ տեղեկացրել է հանձնաժողովին, որ գույքի ներկայացված ցուցակը լիովին չի արտացոլում Մայր Աթոռին պատկան անշարժ գույքի պատկերը: Ներկայացված ցուցակում ներառված են հողատարածքներ, բնակելի տներ, բնակարաններ, առանձնատներ (4 հատ), եկեղեցիներ, առաջնորդարաններ, ճաշարաններ, դպրոց, մանկապարտեզ, ծերանոցներ, միաբանական շենք, ճամբարներ, պանսիոնատներ և առողջարաններ, ատամնաբուժարան, կինոթատրոն, ֆուտբոլի մարզադաշտ՝ իր կառույցներով, արհեստական լիճ և լճի տակ գտնվող մառան և այլն:
ԱԺ նախագահ Հովիկ Աբրահամյանի կարծիքով՝ ճշգրտման կարիք ունի, թե ինչ գումարի մասին է խոսքը, համայնքի հաշվին ինչքան լավություն է արվում եկեղեցուն. «Կողմնակից եմ, որ Առաքելական եկեղեցուն տանք արտոնություններ, բայց համայնքներ կան, որ այդ հարկերի հաշվին են ապրում, և արդարացի չի լինի նման արտոնություն տալը»: Նա առաջարկեց ցանկն ըստ համայնքների և գումարի չափի ամբողջական ներկայացնել:
Պատգամավոր Արծվիկ Մինասյանը նշեց, որ թեև եկեղեցին ունի հատուկ կարգավիճակ և պահպանվող շահեր, բայց մտավախություն կա, որ ՀՀ-ում գործող կրոնական այլ կազմակերպություններ հավասարության սկզբունքով կպահանջեն և կստանան նման արտոնություն իրենց գույքի վերաբերյալ:
Պատգամավոր Նաիրա Զոհրաբյանը հարցադրում արեց, թե, օրինակ, ֆուտբոլի դաշտն ինչո՞վ է նպաստելու եկեղեցուն, որ դրա համար էլ է նախատեսվում հարկային արտոնություն տրամադրել: Լայն դաշտ չբացենք այլոց համար՝ ներկայացնելու պահանջ օգտվելու նման արտոնությունից:
Տարածքային կառավարման նախարար Վաչե Տերտերյանը համաձայնեց, որ կառույցների վերաբեյալ հարցադրումներ են առաջանում, և այդ խնդիրները մտահոգում են նաև կառավարությանը: Ըստ նրա՝ օրենսդրական այս նախաձեռնության մեջ հստակ սահմանվում է, թե որ գույքն է ազատվում՝ հուշարձանի կարգավիճակ չունեցող եկեղեցիները, ծիսական, հոգևոր-մշակութային, կրթադաստիարակչական, եկեղեցական և ծիսական պարագաների արտադրության և իրացման համար օգտագործվող կառույցների, եկեղեցու ներքին սպասարկումն իրականացնող արհեստանոցները և դրանց զբաղեցրած ու հատկացված հողատարածքները և այլն, բայց մարզադաշտը չի մտնում այդ ձևակերպումների մեջ. «Կոնկրետ գույքի ցանկը կորոշի կառավարությունը՝ ըստ ձեռնարկատիրական գործունեության գնահատական տալով տվյալ կառույցին»: Միաժամանակ նա հայտնեց, որ մինչ այս համայնքները եկեղեցուն պատկանող գույքից հարկ չեն ստացել և չեն էլ դիմել դատական միջամտության, և ՏԻՄ-երի եկամտային բազան իրավականորեն է կրճատվում, բայց փաստացի փոփոխություն չի լինի:
