Human Rights Watch միջազգային իրավապաշտպանական կազմակերպությունը Լիբիայում հայտնաբերել է երկրի նախկին առաջնորդ Մուամար Քադաֆիի ենթադրյալ կողմնակիցների 53 մարմիններ, որոնք գնդակահարվել են անցյալ շաբաթ Սիրթի հյուրանոցում: Հյուրանոցը գտնվում է այն թաղամասում, որը եղել է Միսրատայից եկած ապստամբների վերահսկողության տակ:
Ինչպես հաղորդում է CNN-ը, իրավապաշտպանները մարմինները գտել են այն պահին, երբ բնակիչները դրանք տեղավորում էին հսկայական պարկերի մեջ և պատրաստվում էին թաղել:
«Որոշ դիակների ձեռքերը մեջքի վրա կապված են եղել, երբ նրանց կրակել են»,- մեջբերում է CNN-ը արտակարգ իրավիճակների ղեկավար Փիթեր Բուկերտին:
Քաղաքի բնակիչները պատմել են, որ զոհվածների մի մասն իրոք Քադաֆիի կողմնակիցներն են, իսկ մյուսները` պարզապես Սիրթի բնակիչներ:
Իրավապաշտպանները կոչ են անում Լիբիայի ազգային անցումային խորհրդին անմիջապես քննել այդ գործը և պատժել մեղավորներին:
