Թունիսի ժամանակավոր նախագահ Ֆուեդ Մեբազը հրաժարական կտա՝ երկրում Սահմանադրական խորհրդի պատվիրակների ընտրություններից հետո: Այս մասին հաղորդում է Agence France-Presse-ը: 70-ամյա Մեբազը դարձավ երկրի նախագահ այն բանից հետո, երբ 2011 թ. հունվարին երկրից փախավ նախկին նախագահ Բեն Ալին:
«Ես կճանաչեմ այդ ընտրություններն՝ անկախ այն բանից, թե քաղաքական որ ուժերը հաղթանակ կտանեն»,-հայտարարել է Մեբազը:
Ընտրությունները տեղի կունենան հոկտեմբերի 23-ին , որոնց ընթացքում Սահմանադրական խորհրդի համար պատվիրակներ կընտրվեն, ովքեր էլ կկազմեն երկրի նոր սահմանադրության ծրագիրը, ինչպես նաև կորոշեն նախագահի և խորհրդարանի ընտրությունների անցկացման ժամկետները: Բացառված չէ, որ խորհրդարանում մեծ կշիռ ունենա «Ան-Նահդա» իսլամական շարժումը: