Մեքսիկայի կառավարությանը սպասարկող ինքնաթիռը պիկ ժամին ընկել է Մեխիկոյի կենտրոնում:
Աղետից մի քանի րոպե առաջ օդաչուները հաղորդել են ինքնաթիռում ծագած անսարքությունների մասին, սակայն չեն կարողացել վերացնել այն, այնուհետև կապը նրանց հետ կտրվել է:
Անկումն ուղեկցվել է ուժեղ պայթյունով, որի հետևանքով այրվել է տարածքում գտնվող ավելի քան 30 ավտոմեքենա: ինքնաթիռը վայր է ընկել քաղաքի բավական խիտ երթևեկություն ունեցող հատվածում:
Այս պահի դրությամբ զոհերի թիվը ճշտվում է: Նախնական տվյալներով` ավիավթարի հետևանքով զոհվել է 6 մարդ, որոնց թվում են երկրի ներքին գործերի նախարար Խուան Կամիլո Մոուրինյոն, Մեքսիկայի նախագահի` անվտանգության հարցերով խորհրդական Խոսե Լուիս Վասկոնսելոսը և այլ բարձրաստճան պաշտոնյաներ: Աս մասին հայտնում է Reuters գործակալությունը:
Ողբերգությունը տեղի է ունեցել տեղական ժամանակով ժամը 18:40-ին:
Ինչպես հաղորդում են տեղական ԶԼՄ-ները, վթարի հետևանքով տուժել են ավելի քան 40 քաղաքացիներ, որոնցից 5-ի վիճակը գնահատվում է շատ ծանր:
Մեքսիկայի նախագահ Ֆելիպե Կալդերոնը ցավակցություն է հայտնել զոհվածների հարազատներին: Նրան են միացել երկրի հայտնի քաղաքական, հասարակական ու հոգևոր գործիչները:
Նախագահը խոստացել է հետաքննություն անցկացնել: Փորձագետները բացառում են ահաբեկչության փաստը` պնդելով, որ ինքնաթիռը վայր է ընկել տեխնիկական անսարքությունների պատճառով:
Մեքսիկայի ներքին գործերի նախարար Խուան Կամիլո Մոուրինյոն ծնվել է Մադրիդում, 1971թ., Մեքսիկայի քաղաքացիություն ստացել 18 տարեկանում: Նա իր ներկայիս պաշտոնն ստանձնել էր 2008թ.:
