Վենեսուելացի բժիշկ Սալվադոր Նավարետեն, որն ավելի վաղ զբաղվում էր Ուգո Չավեսի բուժմամբ, ստիպված է եղել երկրից հեռանալ այն բանից հետո, երբ հայտարարություններ է արել Չավեսի առողջական վիճակի մասին: Այս մասին երեկ հայտարարել են մեքսիական ԶԼՄ-ները:
Մեքսիկական Milenio Semanal հրատարակությանը տված հարցազրույցում Նավարետեն ասել էր, որ օնկոլոգիական հիվանդությունը, որը հայտնաբերվել է Վենեսուելայի նախագահ Ուգո Չավեսի մոտ, հիվանդության բուժման բարենպաստ ընթացքի հույս չի տալիս, ու որ այդ ախտորոշմամբ հիվանդը կարող է ապրել ոչ ավելի, քան երկու տարի:
Հիշեցնենք, որ ավելի վաղ Չավեսը հայտարարել էր, որ ամբողջությամբ ապաքինվել է:
Նավարետեն ասել է, որ դրանից հետո իր կլինիկա է եկել ոստիկանությունը և հետաքրքրվել իր փաստաթղթերով ու համակարգչով: Այս պայմաններով վիրաբույժը որոշել է ռիսկի չդիմել ու հեռանալ երկրից:
Բժշկի հարցազրույցը լույս էր տեսել այն ժամանակ, երբ Չավեսը հերթական անգամ Կուբա էր մեկնել հետազոտության: Հետազոտությունից հետո նա Twitter-ի իր միկրոբլոգում հայտարարել էր, որ իրեն կատարյալ առողջ է զգում: «Ես միանգամայն ազատվել եմ իմ հիվանդությունից, բայց իհարկե, ես պետք է հետևեմ վերականգնողական պրոցեսին»,- գրել է Չավեսը:
Նշենք, որ հունիսի կեսին Հավանայում Վենեսուելայի նախագահը վիրահատության էր ենթարկվել ներքին աբսցեսի պատճառով: 10 օրց հեռացվել էր նրա աղիքի վրա առաջացած ուռուցքը: Հետագա մի քանի ամիսներին Չավեսն անցել է քիմիաթերապիայի 4 կուրս` 3-ը` Կուբայում, 1-ը` Կարակասում:
