Քիչ առաջ ավարտվեց ԱԷԿ-ի գլխավոր տնօրեն Գագիկ Մարկոսյանի հանդիպումը ատոմակայանի աշխատակիցների հետ, սակայն՝ վատ վերջաբանով:
Հիշեցնենք, որ երեկ ատոմակայանի տնօրենը աշխատակիցներին փոխանցել էր, թե չեն կարող իրենց աշխատավարձերը բարձրացնել, քանի որ գումար չկա, և սա է մեր հանրապետության վիճակը: Իսկ հայկական ատոմակայանի 158 աշխատակիցներ դիմում են ներկայացրել ատոմակայանի տնօրինությանը` խնդրելով բարձրացնել իրենց աշխատավարձը, այլապես դուրս կգան աշխատանքից:
Ինչպես մեզ հետ զրույցում փոխանցեցին դիմում ներկայացրած աշխատակիցները, այսօր իրենք՝ Մեծամորի ատոմակայանի արտադրամասի պետերը, պատրաստել էին մի առաջարկություն, որով աստիճանաբար կբարձրացվեին ատոմակայանի աշխատողների աշխատավարձերը: Ըստ այդմ՝ առաջարկվում էր նոյեմբերի 1-ից աշխատավարձերը բարձրացնել 30 տոկոսով, իսկ հաջորդ տարվա ապրիլի 1-ից՝ ևս 20 տոկոսով:
Ատոմակայանի տնօրեն Գագիկ Մարկոսյանի հետ քննարկման ժամանակ, որը տևեց մինչև աշխատանքային օրվա ավարտը առաջարկը չի ընդունվել: «Այդ տարբերակը դրվեց մեր տնօրենի առջև. հաշվարկեցին, որ իրոք կարող են 25-30 տոկոսի կարգի տալ, սակայն նախարարի հետ զրույցի ժամանակ նախարարը թույլ չի տվել, որ այդ գումարները տրամադրի մեզ: Ասել է, որ 10 տոկոսից ավել չտաք: Ավելին՝ տնօրենը ցանկանում էր դեկտեմբերի 1-ից տալ, բայց նախարարն ասել է, որ միայն մյուս տարի կարող են տաս տոկոս տալ: Արդյունքում ներկա պահին մենք արդեն ստորագրում ենք մեր դիմումները և ազատվում ենք աշխատանքից: Միակ տարբերակը սա էր, բայց չեղավ, առարկեցին»,- մեզ հետ զրույցում տեղեկացրեցին դիմումի տակ ստորագրած աշխատակիցները:
Մեր այն հարցին, թե մյուս 1800 աշխատակիցները միանալո՞ւ են իրենց, թե՞ ոչ՝ պատասխանեցին. «Մնացած բոլոր աշխատողները այսօր իրենք իրենց կամքով միացան մեզ: Բայց նրանց կողմից դիմում գրելու համար այսօր արդեն ուշ է, վաղը հնարավոր է իրենք էլ գան և իրենց դիմումները ներկայացնեն տնօրենին: Հետագայում պարզ կլինի, թե նրանք ինչ քայլերի կդիմեն»:
