ՀՀ փոխվարչապետ, Հայաստանի Հանրապետությունում 2011թ. մարդահամարի նախապատրաստման և անցկացման համապետական հանձնաժողովի նախագահ Արմեն Գևորգյանն այսօր ընդունել է ԱՄՆ Մարդահամարի բյուրոյի ժողովրդագրական ծրագրերի տնօրեն Օլիվեր Ֆիշերին:
Հանդիպմանը մասնակցել է ՀՀ ազգային վիճակագրական ծառայության նախագահ Ստեփան Մնացականյանը: Զրուցակիցները քննարկել են հանրապետությունում իրականացվող մարդահամարի ընթացքին առնչվող հարցեր:
Օ. Ֆիշերը տեղեկացրել է, որ հետևել է գործընթացին և տպավորված է ինչպես աշխատանքների բարձր կազմակերպվածությամբ, սահուն ընթացքով, այնպես էլ հաշվարարների պատրաստվածությամբ և պատասխանատու աշխատանքով:
Անդրադարձ է կատարվել նաև մարդահամարի արդյունքների ամփոփման հարցերին: Հյուրը տեղեկացրել է, որ առաջիկայում Հայաստան կժամանեն ԱՄՆ Մարդահամարի բյուրոյի մասնագետներ, ովքեր կաջակցեն հայաստանցի գործընկերներին այդ աշխատանքների կազմակերպման հարցերում:
Փոխվարչապետը ՀՀ կառավարության անունից շնորհակալություն է հայտնել ԱՄՆ կառավարությանը` մարդահամարի կազմակերպմանը ցուցաբերած աջակցության համար: Նա կարևորել է նաև ամերիկյան կողմի օժանդակությունը գործընթացի հաջորդ` արդյունքների ամփոփման փուլին:
Նշելով, որ մարդահամարի աշխատանքների արդյունավետ կազմակերպումը վստահություն է ներշնչում շահագրգիռ կողմերին` Ա. Գևորգյանը տեղեկացրելմ է, որ կառավարությունն աշխատում է միջազգային դոնոր կազմակերպությունների, տարբեր պետությունների հետ` արդյունքների ամփոփման փուլի համար անհրաժեշտ միջոցների ներգրավման ուղղությամբ:
